Home > Centros educativos > La Conseyería discrimina al alumnáu de la enseñanza pública

La Conseyería discrimina al alumnáu de la enseñanza pública

imagesEl programa de préstamu de llibros de testu sigue xenerando inquietú y refugu nos centros educativos asturianos, sobre too nos de secundaria.

SUATEA empobinóse la otra semana a l’Alministración Educativa pa entrugar pola situación na que quedaba l’alumnáu de los centros privaos concertaos respecto a los llibros de testu pal próximu cursu.

La respuesta llegónos pela prensa: como temíemos, pa esi alumnáu sigue en marcha la normativa anterior que concede personalmente a cada alumnu o alumna beneficiariu nesti casu de beca los 105 euros pa que seya la so familia la que decida a qué los destina. Dase’l casu de qu’en dellos centros concertaos los llibros mérquense directamente nel propiu centru.

Mentanto, nos centros públicos ta obligándose a los equipos directivos a poner en marcha un programa de préstamu de llibros de testu que ta xenerando quexes abondes y que, de facese, va supner una medría descomanada de la carga de trabayu nos centros educativos nun momentu como esti d’incertidume deriváu de los cambios normativos y los recortes.

La Conseyería d’Educación sigue ensin contestar a les numberoses entrugues que los equipos directivos-yos fixeron, lo que supón que cada centru tea tentando iguar los problemes que xenera esti Programa como puede.

Lo que ta claro ye que la Conseyería d’Educación, con esti sistema, afita una discriminación p’alumnáu de los centros públicos:

  • L’alumnáu de la privada concertada recibe 105 euros pa gastar en llibros, material o otres coses, mientres que l’alumnáu de la pública nun recibe nenguna cantidá.
  • L’alumnáu de la pública nun tien beques sinón que participa nun programa de préstamu. L’alumnáu de los centros privaos concertaos, si tien quien-y empreste los llibros, puede dedicar los 105 euros a otru material escolar.
  • Si l’alumnu o alumna de la pública cambia de centro, pierde’l derechu a conservar los llibros de testo. Na concertada son de la so propiedá.

Estes discriminaciones vienen a añedise a la polémica entamada pola actuación de la Conseyería d’Educación qu’en cuenta d’organizar los bancos de llibros cola participación de la comunidá educativa siguiendo los exitosos modelos de dalgunos centros públicos y apurriendo a los centros personal, medios y espacios pa facer tan importante midía, enfótase n’imponer una normativa que ca vez xenera más malcontentu ente’l profesoráu y los equipos directivos.

En cuenta d’avanzar na gratuidad de llibros de testu y material escolar, lo que se fai ye xenerar discriminación pa l’alumnáu de la escuela pública. La Conseyera en funciones nun puede siguir alantre con esta normativa.

Esta entrada tamién se puede consultar en: Castellanu