Home > Comunicaos > La Conseyería d’Educación, incapaz de xestionar al so propiu personal

La Conseyería d’Educación, incapaz de xestionar al so propiu personal

La Conseyería d’Educación, incapaz de xestionar al so propiu personal

Tasa d’interinidá del 30%: una bomba de reloxería qu’españó

Dende va selmanes, cientos d’alumnos y alumnes asturianos atópense ensin profesores en delles materies pola incompetencia de la Dirección de Xeneral de Personal Docente y Planificación Educativa na xestión de les llistes de profesoráu interino. Dende SUATEA llevamos años avisando de qu’una tasa d’interinidá del 30% ye insostenible, qu’esti desfase ye una bomba de reloxería qu’en dalgún momentu podría españar y de forma inevitable esi momentu llegó.
La Conseyería dexó que delles llistes d’interinos s’escosaren y nun fixeron nada por evitalo, magar les repitíes alvertencies que se realizaron per parte de SUATEA. Les llistes escoses lleguen a 25 y, magar d’ello, la Conseyería solo abrió n’ochobre bolses de trabayu en 15 especialidaes, esto ye, nin siquier convocaron toles llistes escoses.
De resultes de too esti desastre de xestión, la selmana pasada decenes de places quedaron ermes. De les 39 places ufiertaes correspondientes a los cuerpos de secundaria, 25 nun se cubrieron. Como exemplu, na especialidá de Formación y Orientación Llaboral quedaron ensin cubrir 6 places de les 7 ufiertaes; n’Alemán quedaron ermes 4 places de les 5 ufiertaes; en Procesos Comerciales quedaron ermes les 4 places ufiertaes; lo mesmo que n’Alministración y Dirección d’Empreses, etc. Teniendo en cuenta que’l procesu d’apertura, baremación y publicación de llistes lleva una media de tres meses, cientos d’alumnos y alumnes nun van tener profesores en munches materies mientres llargos periodos de tiempu. Y tarrecemos qu’esti númberu va dir n’aumentu según vaigan surdiendo nueves necesidaes a lo llargo de les próximes selmanes.
Esta situación producióse pol tratu denigrante qu’esta Alministración dio al profesáu interino y que derivó en que les persones que va años taben nes llistes, buscaron salida profesional n’otres Comunidaes o sectores.
Ye intolerable que los responsables, Dirección Xeneral de Personal Docente y Planificación Educativa, lleven al alumnáu asturiano a esta situación. Poro, dende SUATEA esiximos:
• Responsabilidaes polítiques ante esta incompetencia manifiesta.
• Una solución inmediata a esti problema previsible y poro inalmitible.
• Negociación d’un nuevu Alcuerdu d’interinos que recueya los siguientes aspeutos: estabilidá nel empléu pa quien tán trabayando anguaño; llistes nes que prevaleza l’antigüedá per delantre de cualesquier otru criteriu; non obligatoriedá de presentase a oposiciones pa quien se presentare a anteriores procesos selectivos; contratu indefiníu pa mayores de 55 años; reconocencia de derechos de les persones afectaes por discapacidá, etc.
• Ufierta pública d’empléu de siquier mil places nel presente cursu.
• Tratu dignu al profesoráu interino: que les places a media xornada se dean namá en casos escepcionales, un calendariu d’axudicaciones a la fin del periodu lectivu que dexe solucionar les incidencies, etc.

Uviéu, 26 d’ochobre de 2015
Secretariáu de SUATEA

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778