Home > Aición sindical > La conseyería aplica la LOMCE y los sos recortes

La conseyería aplica la LOMCE y los sos recortes

SUATEA, xunto con CCOO, FETE-UGT y la Federación de Padres d’Asturies “Miguel Virgós”, concentróse ayeri delantre de la Xunta Xeneral d’Asturies n’Uviéu contra la LOMCE y los recortes.

Esti 2014-15 ye’l primer cursu académicu nel que la LOMCE ta en vixencia y yá podemos apreciar de forma significativa la so permiciosa influencia nel sistema educativu públicu asturianu en dos meses d’aplicación.

El mes de setiembre foi una auténtica llocura nos centros educativos del país, y la materialización de les sospeches que dende SUATEA llevábemos dando avisu. La plantiya docente sigue menguando pasu ente pasu, cuando pensábemos que yera imposible sacar más docentes de les escueles y institutos, la conseyería d’educación demuéstranos que son capaces d’eso y de más, con centros educativos al borde del colapsu por falta d’hores. Casu paradigmáticu, y escandalosu, son los centros de FP básico onde tovía a estes altures del cursu escolar falten docentes por adxudicar, demostrando la falta de planificación y de procuru de la conseyería.

El mapa educativu que podemos trazar nesti momentu dende SUATEA ye:

  • Un aumentu significativu de docentes a media xornada, sirviendo de puzzle pa cuadrar horarios tanto n’Infantil y Primaria como en Secundaria.
  • Un aumentu del númberu d’escolares nes aules, ensin qu’ello signifique un aumentu de docentes, sinon tolo contrario.
  • Xeneralización de los especialistes-tutores en Primaria, con tola problemática qu’ello supón, y únicamente buscando un aprovechamientu máximu de los docentes ensin valorar la calidá.
  • Desmoralización del profesoráu.
  • Desapaición de los apoyos educativos pola falta d’hores de la plantiya docente.

Ye dicir, l’aplicación de la LOMCE ensin aplicar nengún de los rescoldos que la llei permite a la Conseyería d’Educación pa llimitar les mancadures al enseñu públicu asturianu. El gobiernu del PSOE n’Asturies sigue la llinia trazada dende’l gobiernu del PP en Madrid de privatización y desmantelamientu de los servicios públicos básicos, nesti casu l’educativu.

Estes polítiques nun tienen nada que ver cola “crisis”, ye una cuestión ideolóxica d’aplicación de les midíes neolliberales más ultramontanes que se recuerden. Ye un ataque global y planificáu de derribu al estáu del bientar y a los derechos básicos algamaos poles clases populares depués d’años de llucha.

El gobiernu asturianu y la conseyería d’educación tienen na so mano iguar esta situación, únicamente aplicando la llei:

  • Meyorando les condiciones llaborales del profesoráu que vien sofriendo nos últimos años un aumentu significativu del so horariu llectivu.
  • Aumentando’l númberu de docentes nos centros educativos, lo que permitiría aumentar los apoyos educativos y el mantenimientu de dellos programes agora abandonaos por falta de personal pa llevalos a cabu.
  • Reduciendo’l númberu d’alumnáu por aula, permitiendo una mayor individualización nel procesu d’enseñanza-aprendizaxe.

Esta tarde, nel Campus de Santullano, dientro del Foru Social organizáu poles Marches de la Dignidá, la nuestra compañera Beatriz Quirós va participar na mesa que lleva por títulu “Educación y neolliberalismu“, animámoste a participar.

 

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344