Home > Aición sindical > La Conseyería anecia en primar los criterios economicistes sobre los educativos

La Conseyería anecia en primar los criterios economicistes sobre los educativos

contra los recortes plantiya Mesa sectorial sobre plantiyes y sobre la Ufierta d’Emplegu Públicu

Na Mesa Sectorial d’Educación que se celebró na mañana del día 12 de febreru y que va siguir la selmana que vien, SUATEA recriminó a l’Alministración el desmantelamientu de les plantiyes que sigue aconteciendo n’Asturies.

SUATEA afeó l’actuación de la Conseyería d’Educación ya que la forma na que se xestó la ellaboración d’esta propuesta de plantiyes foi llaceriosa: les direcciones de los centros tuvieron un plazu de 48 hores pa facer les alegaciones a una propuesta incompleta y que foi modificada unillateralmente pola alministración nuna “segunda vuelta”. En dellos casos la conseyería asumió les alegaciones de los centros. Pero en munchos otros, l’alministración procedió a eliminar places necesaries pal funcionamientu de los mesmos y notres a tresformar les places ordinaries en billingües ensin l’alcuerdu del centru y del profesoráu afectáu por esti proceder. Tamién plantegamos la necesidá de cuntar con tola información sobre’l númberu d’unidaes pa poder abordar la situación col rigor necesariu.

L’alministración cacarexa de la criación de 52 places pal cursu que vien. Lo cierto ye que la criación de places que plantega l’alministración ta venceyada a la puesta en marcha del Decretu d’Orientación, respaldáu por SUATEA y otres organizaciones y que supón l’incrementu de la dotación d’Orientadores (van crease 38 places fundamentalmente nos centros de primaria) y profesoráu de les especialidaes de PT (13), AL (5) y Servicios a la Comunidá (7).

Esti Decretu, negociáu cola anterior Directora Xeneral de FP foi apoyáu nel so momentu por SUATEA ente otres cuestiones porque diba acarretar la criación de puestos de trabayu nun ámbitu con tantes necesidaes n’Asturies. Pero la rialidá de la propuesta que l’Alministración presenta a la Mesa ye una sangría de los puestos de trabayu nes materies correspondientes a les diferentes asignatures nel Enseñu de Secundaria y Bachilleratos.

Nestos enseños desapaecen decenes de puestos de trabayu, por exemplo, 11 de Llingua Castellana, 6 de Xeografía y Historia, 4 de Llatín, 4 de Matemátiques, 4 de Bioloxía y Xeoloxía, 3 de Física y Química, 1 de Francés, 6 d’Educación Física, 1 de Dibuxu, 1 de Griegu, 4 de Filosofía, 1 de Fogar, 1 de Tecnoloxía, 3 de Música, 1 d’Apoyu al Aria Práctico, y solo se creen 7 d’Inglés y 2 de Cultura Clásico. Les places de les persones que se xubilen amortícense y esto supón que nos centros de Secundaria hai cada vuelta menos profesoráu p’asumir la docencia, los grupos flexibles, les guardies, l’atención a la diversidá y les tutoríes.

N’Infantil y Primaria la perda d’emplegu, descontando les places correspondientes a l’atención a la diversidá a les que facíemos referencia más arriba, ye de 16 puestos.

Piérdense 5 d’Educación Infantil, 6 d’Educación Física y 5 de Música. Críase 1 de Primaria y 10 d’Inglés. El saldu ye la perda de 5 puestos de trabayu.

Nos dos casos anteriores, SUATEA llamentó que nun se respeten los alcuerdos sindicales en materia de plantiyes, asina como los apoyos n’Infantil, los desdobles, los ámbitos d’itinerancia… y solo s’apliquen criterios economicistes na determinación de la plantiya.

L’alministración remitió esta mañana a les organizaciones sindicales una nueva propuesta sobre la Ufierta d’Emplegu Públicu con un pequeñu incrementu nes places nes distintes especialidaes que s’anunciaren. Nun hai nueves especialidaes convocaes nin un aumentu granible de la ufierta respecto a la primer reunión. La ufierta pasaría a ser de 38 places na especialidá de Primaria, 21 p’Audición y Llinguaxe, 28 en Pedagoxía Terapéutico, 68 n’Educación Infantil y 33 d’Inglés.

Trátase d’una ufierta claramente insuficiente y que sigui ensin resolver el grave problema de la precariedá nel emplegu docente y la destrucción d’emplegu públicu.

SUATEA va plantegar nuevamente na reunión de la Mesa los sos esmolecimientos acerca de la convocatoria, tresparencia, anonimatu, convocatoria del 100% de les places y esixencia d’una verdadera negociación que sirva pa criar emplegu públicu y va refugar la rotación nel emplegu con una convocatoria exigua de places, que ye consecuencia del nuevu alcuedu d’interinos a aplicar tres la celebración d’oposiciones.

Esta entrada tamién se puede consultar en: Castellanu