La conciliación de la vida familiar y llaboral: un espeyismu

Esta entrada está disponible en: Castellano (Castellanu)

L’espeyismu de la conciliación de la vida familiar y llaboral na educación asturiana

El 1 de xineru de 2017 entró en vigor l’ampliación del permisu de paternidá de 2 a 4 selmanes. Esa ampliación retardárase dende l’añu 2011. Trátase d’una midida que, en teoría, pretende fomentar la natalidá y la corresponsabilidá ente homes y muyeres.

Dende la Conseyería d’Educación unvióse a los centros educativos d’Asturies l’actualización d’esi permisu y da unes instrucciones pa realizar les sustituciones d’aquellos docentes que tengan derechu a esfrutarlu.Nesesdirectrices, queda clara la intención de la nuesa Conseyería d’Educación de nun realizar contrataciones pa sustituyir a los padres que s’acueyan a él .

Nes instrucciones, recuérdase a les direcciones de los centros que les sustituciones, nos primeros diez díes, tienen de ser realizaes colos recursos del propiu centru. En SUATEA preguntamos ¿con qué medios? Porque colos retayos de plantiyes de los últimos años y l’aumentu d’hores lectives, naide, dientro del profesoráu, tien disponibilidá horaria. Ta claro qu’a la nuesa Conseyería impórten-y más les consecuencies económiques causaas poles contrataciones que les consecuencies pal alumnáu motivaes pol baille provocáu cola dotación  de profesoráu de guardia (cada día una persona nueva a lo llargo cuatro selmanes y amás ensin la especialización docente necesaria).

Nes instrucciones unviaes dende la Conseyería encamiéntase a les direcciones a tener en cuenta: “l’amenorgada duración del períodu a sustituyir col tiempu d’adaptación y organización mínimu pa la persona sustituta”. Dende SUATEA gustaríanos manifestar que la mesma esmolición merez, per parte de la nuesa Conseyería, el nuevu padre que se ve penalizáu na  so reincorporación, yá que se va atopar con un auténticu rascacielos d’actividaes por correxir productu de les 80 hores de clase que nun se dotaron de profesoráu mientres l’esfrute del permisu.Quiciabes lo que ta embaxo ye la intención de torgarque los profesores soliciten el permisu de paternidá.

Toes estes instrucciones son finamente arreglaes con una retafila de recordatorios llegales sobre les obligaciones de les direcciones de los centros para cola Alministración, sicasí, apréciase un olvidu manifiestude les obligaciones d’ésta para coles persones alministraes por ella; y lo que ye peor, un obviu despreciu polos derechos de los/les trabayadores.

Estes son les instrucciones que vienen d’una Alministración y una Conseyería d’Educación que diz tar esmolecía pol esbarrumbe de la natalidá n’Asturies.

Dende SUATEA queremos denunciar:

– La finalidá puramente pecuniaria d’estes instrucciones.

– Instrucciones como esta nun faen sinón desanimar a los homes a esfrutar del so permisu de paternidá, negándo-yos l’esfrute d’esta y emponiendo a les muyeres a perpetuar los roles de xéneru no qu’a los cuidos toca.

– La falsa defensa de la conciliación de la vida familiar y llaboral que se realiza na Conseyería d’Educación

– Les amenacies velaes a les direcciones de los centros si nun acaten les instrucciones de l’Alministración, y.

– L’acoso per parte de los responsables de la Conseyería d’Educación a los/les sos trabayadores.

Uviéu ,19 de xineru de 2017

El secretariáu de SUATEA

Print Friendly, PDF & Email

Esta entrada está disponible en: Castellano (Castellanu)