Home > Aición sindical > La clase trabayadora nun pue volver pagar la crisis

La clase trabayadora nun pue volver pagar la crisis

LA CLASE TRABAYADORA NUN PUEDE VOLVER PAGAR LA CRISIS

La llegada de la pandemia pilló a la ciudadanía desprevenida, naide s’maxinaba lo que diba asoceder desque s’entamó a dar noticies de los casos de persones afeutaes por esti nuevu coronavirus. Los acontecimientos asocedieron de manera alarmante y pasemos de negar l’amplitú y complexidá d’esta nueva enfermedá a tar confinaos dellos meses nes nueses cases. Esta situación ensin precedentes sacó a la superficie les faltes del nuesu mal llamáu estáu de bienestar, tres años de polítiques agresives contra’l conxuntu de servicios públicos (Sanidá, Educación, Dependencia, Tresportes, Servicios Sociales, etc.).

Asina, el sistema sanitariu nun tardó en colapsar ante la cantidá de persones afeutaes, dexando n’evidencia que les polítiques privatizaores y l’abandonu del apueste por una sanidá pública calidable, foron polítiques errónees y peligroses. Asina, los nuesos centros de salú públicos atopáronse   ensin capacidá de dar la rempuesta necesaria y los centros privaos zarraos, por si acasu tocába-yos daqué que nun fueren beneficios. Los servicios sociales ensin capacidá d’atender a les persones con necesidaes, les residencies de persones mayores ensin apenes personal, ensin tomar midíes pa evitar los contaxos y en dellos casos, dexando morrer a les nueses persones mayores ensin nengún tipu d’atención. La educación vióse obligada a llevala a cabu dende casa, la fienda social disparada cola fienda dixital acomuñada a esta, de manera que les families más desfavorecíes atopáronse ensin medios pa siguir la educación de les sos fíes y fíos. L’abandonu escolar d’un importante númberu d’alumnáu entá nun se consiguió frenar.

El teletrabayu camudó totalmente les condiciones llaborales, el trabayu n’empreses dio pasu al individualismu, quitando poder a la negociación colectiva. Ensin escaecer la situación de les muyeres, el teletrabayu devolvió a les muyeres al llar col consiguiente aumentu de la carga de trabayu, amás, al ser les que tienen peores trabayos la crisis económica ta cebándose con elles asitiándoles en munchos casos al borde la probitu.

Énte esta situación, les persones afeutaes pol zarru de negocios y empreses empezaron a enllenar les coles del paru, de los bancos d’alimentos,… Ta claro qu’esta pandemia dexó n’evidencia que nel Estáu español les coses nun diben tan bien como queríen facenos creer y que la salida de la crisis del 2008 nun yera tala. El sistema capitalista aboga por poner enriba la economía y el beneficiu priváu d’unos pocos percima de la salú y  la vida de toles persones. Les nueses vides nun-yos importen solo los sos negocios.

Dende’l Gobiernu central tomáronse midíes pa, según ellos, “nun dexar a naide atrás”, sicasí los esfuerzos la magnitú de la pandemia dexó claro que nun se pudo llegar a toles persones con problemes, porque había muncha población con problemes económicos, con trabayos precarios o ensin contratos, persones migrantes ensin papeles que sobreviven de la economía somorguiada lo que fai imposible que reciban una ayuda digna.

La recesión económica ye la mayor n’años, la capacidá de xenerar empléu sumióse, la respuesta ciudadana tarazada pola imposición de midíes drástiques pa cortar l’espardimientu del virus mientres los poderes económicos siguen maniobrando pa salir indemnes d’esta situación y la clase trabayadora y les persones más desfavorecíes nun terminen d’aunir esfuerzos pa defender los nuesos intereses de clase, cuando ye más qu’evidente que la mayor afeutación de les consecuencies de la pandemia tán careciéndoles la clase trabayadora y les persones más desfavorecíes (ERTES, desagospios, coles de la fame, confinamientos seleutivos per zones obreres, etc).

Pal sistema capitalista esta pandemia tien una llectura de clase. Nun afecta por igual a los poderosos como a los sectores populares y a la clase trabayadora. Cola sida de combatir los efeutos de la pandemia, tán poniéndose en marcha polítiques con un claru sesgu clasista y segregador.

La pandemia púnxonos nel compromisu de puxar por un cambéu que s’empobine a la escontra d’un proyeutu ecosocial, xustu y democráticu o si non siguir el caleyu que mos lleva hacia l’escosamientu de los recursos, la esclusión social y la vulneración de los derechos humanos. Avanzar nel procesu de descarbonización de la economía tien que dir acompañao de midíes de transición xusta pa la clase trabayadora, lo que significa empléu más sostenible, estable y calidable. Nun queremos les vieyes recetes neolliberales vistíes de verde.

El ciclu pa fomentar les reivindicaciones entró nuna fase nueva carauterizada poles dificultaes pa l’aición colectiva por cuenta de les restricciones qu’impón la pandemia.  Asina y too, tán produciéndose movilizaciones llaborales n’ámbitos como Educación o Sanidá magar la imposición de servicios mínimos qu’afueguen l’exerciciu del derechu de güelga.

Por ello dende la Confederación Intersindical consideramos imprescindible afitar aliances en tolos ámbitos sociales pa llevar alantre una llucha coleutiva y unánime ente toles organizaciones qu’aspiramos a un cambéu social,  coles mires d’esixir al gobiernu:

•             La derogación de les reformes llaborales de 2010 y 2012 que facilitaron les consecuencies de la pandemia nel ámbitu llaboral.

•             Midíes reales pa combatir el desempléu.

•             La derogación de les reformes de les pensiones de 2011 y 2013.

•             La meyora de los salarios, aumentar el Salariu Mínimu Interprofesional y les pensiones mínimes.

•             L’amenorgamientu de la xornada llaboral, y tamién reordenar y racionalizar los horarios llaborales, partiendo’l trabayu pa trabayar menos y trabayar toes.

•             El cumplimientu estrictu de les Lleis, de la normativa y les disposiciones sobre salú y seguridá llaboral, p’acabar cola lacra de los accidentes llaborales.

•             Que s’echen p’atrás les concesiones alministratives y se potencien los servicios públicos esenciales -educación, sanidá, servicios sociales, tresporte, bienes comunes, dependencia…-.

•             Establecer mecanismos d’afitamientu nel trabayu del personal eventual ya interino de les alministraciones públiques, en llínea cola xurisprudencia establecida pol TJUE, según la tresposición de la direutiva 1999/70 CE al ámbitu de les Alministraciones Públiques, xunto cola anulación del alcuerdu de “meyora” del empléu públicu de marzu de 2017, soscritu pol gobiernu del PP con CCOO, UXT y CSIF.

•             Afitar midíes efeutives pa combatir la fienda salarial y el techu de cristal.

•             Poner fin de manera definitiva, nel mundu del trabayu, a les discriminaciones por razones de xéneru, orientación sexual, procedencia o edá.

•             Una renta básica universal.

•             Una fiscalidá xusta y progresiva onde quien más tienen más apurran.

•             Avanzar a la escontra d’un nuevu modelu granible basáu n’I+D+I, medioambientalmente sostenible, y con empléu calidable, estable y bien retribuyíu.

CONFEDERACION INTERSINDICAL

OCHOBRE DE 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344