L’asamblea d’interinos de SUATEA refuga’l borrador de la Conseyería

Desvinculación de les oposiciones y estabilidá pal profesoráu, reclamos principales de los docentes

Güei llunes féxose nel IES Aramo d’Uviéu una asamblea de docentes interinos convocada por SUATEA, onde s’informó de los conteníos del cuartu borrador de propuesta d’alcuerdu presentado pola Conseyería d’Educación. L’asamblea, con xente a esgaya, alcordó el refugu unánime a dicha propuesta por nun atender dos reivindicaciones fundamentales del colectivu de docentes interinos, que abarca yá a casi 2.500 persones, un 23% del total de la plantiya de la escuela pública asturiana:

• Desixencia d’estabilidá del colectivu, que queda en cuestión dende’l momento en que la propuesta de la Conseyería camina hacia un modelu qu’implica la rotación nel empléu, siguiendo la llínia de les comunidaes gobernaes pol PP.
• Desixencia de desvinculación de les oposiciones de les llistes d’interinidá, por entender que’l valir del profesoráu interín queda acreditada enforma mediante l’exerciciu de la docencia, y porque resulta inaceptable pretender obligar a los docentes a pasar periódicamente unes pruebes pa siguir siendo trabayadores precarios.

D’otru llau, l’asamblea manifestó refugar dafechu la convocatoria d’oposiciones esti añu, como pretende la Conseyería, yá que siendo Asturies la única comunidá en convocar nes especialidaes anunciaes, y amás con una cantidá ridícula de places, vuelve a suponer un agraviu pal profesoráu asturianu al vese sometíu al efectu llamada dende otres comunidaes que tala ufierta pública d’empléu supón.

Pa rematar, l’asamblea fai un llamáu al conxuntu de los trabayadores de la enseñanza a amosar el so refugu a les pretensiones de la Conseyería convocando una concentración pa esti miércoles 2 d’abril a les 18:30 hores delantre la Xunta Xeneral del Principáu.