L’alministración avanza la primer propuesta de places pa oposiciones

Esta entrada está disponible en: Castellano (Castellanu)

L’alministración convoca la Mesa Sectorial pa entamar la negociación sobre les places docentes que van ser convocaes esti cursu tanto pal casu de les especialidaes del Cuerpu de Maestros como pa la Inspección educativa.   Ver ANEXU.

La propuesta ye claramente ruina como yá manifestemos na reunión del vienres cola Xunta de Personal Docente y nun llega nin pa cubrir les baxes producíes nesti cursu. Les xubilaciones siguen a un ritmu imparable, dada la elevada edá del profesoráu. Esta propuesta qu’abaxo se relaciona nun se correspuende cola necesaria convocatoria de places qu’acaben cola insoportable situación de precariedá de la escuela pública asturiana.

La convocatoria por especialidaes nun vien acompañada de los datos de personal interín en vacante y con sustituciones por xubilación pa esti cursu, lo que pon estorbises a la negociación.

Amás, cola aplicación del alcuerdu d’interinos firmáu por ANPE y FETE, habrá docentes que veránse espulsaos de les bolses d’empléu colo que les sos posibilidaes de trabayar reduciránse, daqué buscao pola alministración y que cuntó col preste d’estes dos organizaciones. Reclamamos polo tanto, un nuevu alcuerdu qu’ente otres coses permita ampliar el perfil profesional de los docentes y que nun llende la posibilidá de tar en delles llistes.

SUATEA desixe a l’Alministración una medría nel númberu total de places ufiertaes qu’empiece seriamente a reducir la tasa d’interinidá n’Asturies y la negociación d’un nuevu alcuerdu d’interinos que nun manque al profesoráu interín que trabaya n’Asturies y que garantice la estabilidá del colectivu.


NOTA: Si tenéis interés n’oposiciones n’otros llugares del Estáu podeis consultar el menu Profesoráu -Interín -Estatal

Print Friendly, PDF & Email

Esta entrada está disponible en: Castellano (Castellanu)