Home > Centros educativos > Iniciu de cursu: más alumnáu, menos profesoráu y un cientu d’irregularidaes

Iniciu de cursu: más alumnáu, menos profesoráu y un cientu d’irregularidaes

fotoruedaprensainicocurso13_14Nesti cursu qu’agora entama cola convocatoria de les anunciaes movilizaciones contra la LOMCE y que n’Asturies van concretase en feches próximes, SUATEA quier informar a la opinión pública y a la comunidá educativa asturiana que los retayos educativos nun son namás patrimoniu del ministru Wert sinón que n’Asturies asistimos a un progresivu esmantelamientu de les plantiyes de los centros educativos ente otres midíes de retayu.

Según los datos facilitaos pol Director Xeneral de Personal Docente, esti cursu tán matriculaos en centros educativos de la rede pública n’Asturies 49.491 neños y neñes d’educación infantil y primaria. Esto constitúi una medría d’alumnáu pero non d’unidaes (esaníciense siete aules d’Infantil), lo qu’implica que nos centros ta obligándose a incluyir más alumnos en cada aula superando en munchos colexos de les zones urbanes la ratio establecida de 25 alumnos/as por aula. Magar nos últimos cursos l’alumnáu ta aumentando ((+5.442 alumnos/es dende’l cursu 2010-11 al cursu 2013-14)), el total de profesoráu p’atender a esti alumnáu mengua añu tres d’añu de forma progresiva (-1.557 docentes dende’l cursu 2010-11 al cursu 2013-14). Asina nos trés últimos años por cada 4 alumnos/es de nuevu ingresu nel sistema perdióse 1 docente.

Cada vez hai menos profesoráu p’atender a un mayor númberu de neños y neñes. Les xubilaciones nun se cubren, los sofitos esaníciense y los centros cunten con cada vez menos profesoráu y personal non docente p’atender una xera cada vez más complexa.

Tamién vemos como nos últimos cursos aumenta de forma esponencial la contratación de profesoráu interín a media xornada. Va unos años esti tipu de contratos yera anecdóticu pero anguaño asítiase nel 40% polo qu’esti colectivu ve empioraes sustancialmente les sos condiciones de trabayu.

Estes circunstancies, xuntu col caltenimientu del aumentu d’hores lectives en Secundaria, la eliminación de profesoráu de sofitu n’Infantil y Primaria y la non restitución de la ratio a 20 neños/es n’Infantil de 3 años, van torgar una fayadiza atención al alumnáu, especialmente nel campu del’atención a la diversidá cuidao que nun podrán realizase sofitos nin desdobles. A too esto tenemos qu’añedir la negativa sistemática de la Conseyería a facilitar datos referentes a: númberu total de profesoráu, númberu d’unidaes en cada centru, númberu de xubilaciones, etc., según la falta de diálogu refugándonos reiteradamente cualquier tipu de xunta con interlocutores válidos, nun intentu d’ocultar los retayos a los que someten a la escuela pública añu tres d’añu. Dientro de l’axudicación del profesoráu interín, detectáronse numberosos erros informáticos qu’impliquen la non contratación del aspirante por fallos de l’alministración.

Esti fechu faise másevidente nes enseñances artístiques onde la ufierta ye bien escasa. Nestes enseñances, amás, prodúcense contrataciones a la carta resalvando l’alministración la normativa esistente. SUATEA desixe la solución a estos problemes xeneraos pola mesma alministración como demandemos reiteradamente.

Nesta llínea sufrimos otru cursu más la falta de profesoráu una vegada entamaes les clases. Afecha de güei, según información unviada pelos centros, podemos afirmar que son necesarios cientos de profesores pal correctu desenvolvimientu de l’actividá llectiva.

Nel casu de la Llingua Asturiana y Gallego-asturianu la situación ye especialmente sangrante, yá que ye probable qu’en dellos casos nun puean impartise les asignatures pola falta de previsión del’Alministración que nun convocó la creación de nueves bolses d’interinidá sabiendo, dende mediaos del cursu pasáu, que taben escosando les llistes actuales. D’otru llau les característiques propies de les places que se tarden más en cubrir (en zones rurales de les ales d’Asturies, toes elles a media xornada y más de la metá itinerantes) nun muestren más qu’una precariedá de nefastes consecuencies pa la calidá de la enseñanza y pal desenvolvimientu de la área d’Asturianu y Gallego Asturianu. Añu a añu vemos cómo la desidia y la falta d’interés por normalizar, recuperar y promocionar lallingua propia provoca un deterioru que sedrá revesosu d’iguar nun futuru. Nun se cumple la Llei d’usu y promoción nin se faen realidad promeses como la criación de la especialidá prometida pola Conseyera d’Educación. Ye fundamental estabilizar l’asignatura nel sistema educativu y que llegue al estatus qu’otres árees tienen. Pa ello, ún de los encontos más importantes ye’l profesoráu, que tien qu’estabilizase y poder garantizar una continuidá nes enseñances nos centros educativos.

Por too ello dende SUATEA desiximos:

  • Entamar darréu’l procesu d’apertura de nueves bolses d’interinidá, condición indispensable papoder atender toles necesidaes actuales de profesoráu.
  • Criar yá la especialidá de Llingua Asturiana y Gallego-asturianu y que ello conlleve la convocatoria d’oposiciones qu’estabilice la plantiya de l’asignatura.

N’otru orde de coses hai que mentar la falta de previsión de la Conseyería d’Educación y d’otres alministraciones locales tocantes a les obres a realizar nos centros educativos. Dempués de casi dos meses d’inactividá lectiva, en dellos casos éstes entamaron xustu enantes del entamu de les clases, apesar de qu’implicaben cambeos nes cubiertes o recrecidos de los edificios con una manifiesta peligrosidá pa la integridá del alumnáu y del personal que nellos s’atopen. Tamos entós énte un entamu de cursu convulsu, con movilizaciones del profesoráu interín como la convocada dende dellos colectivos pal próximu martes 17, que dende esti sindicatu entendemos y sofitamos, conscientes de qu’acechen, amás, les amenaces de más perdes de puestos de trabayu cola reorganización del mapa escolar y les anunciaes fusiones de centros y el cambéu de xestión de les escueles de 0 a 3 años. Esto postreru pue convertise nuna privatización tapada. Esta Conseyería abandona la vocación de Serviciu Públicu n’ares de la rentabilidá.

SUATEA denuncia quel’esmantelamientu de la rede d’educación pública sigue per parte de los nuesos políticos non yádel gobiernu central sinón tamién del autonómicu.

Descargar PDF: Rueda de Prensa d’Aniciu de cursu 2013/14
Visualizar en Scribd: Rueda de Prensa d’Aniciu de cursu 2013/14

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743