Home > Comunicaos > Informe mesa MECD procesu estabilización

Informe mesa MECD procesu estabilización

MESA SECTORIAL DEL MECD SOBRO PROCESU D’ESTABILIZACIÓN

El xueves, 26 d’ochobre, celebróse la segunda Mesa sectorial del MECD p’axustar el procesu d’estabilización por aplicación l’Alcuerdu pa la meyora l’empléu públicu de 29 de marzu y los Presupuestos Xenerales del estáu de 2017.

EL Ministeriu:

  • El MECD convoca esta Mesa sectorial p’axustar l’aplicación del Alcuerdu pa la meyora del empléu públicu de la Mesa xeneral de Función Pública, de 29 de marzu, y de los PXE 2017, que recueyen l’amenorgamientu de la tasa d’interinidá al 8%. Mientres estos procesos podríen convocase hasta 100.000 places.
  • Les ufiertes d’empléu aprobaránse en trés años (2017-2019) y van executase en cinco (2018-2022).
  • El Ministeriu considera que l’actual sistema d’accesu, reguláu pol RD 276/2007, cumple colos requisitos de llibre concurrencia, igualdá, méritu, capacidá y publicidá. Nun hai tiempu pa encetar la negociación d’un nuevu sistema d’ingresu. Proponen retocar el RD 276/2007 nos siguientes aspeutos:
    • Aumentar el valor de la esperiencia docente, que supondría 7 puntos (7 años) na fase de concursu (anguaño, son 5 puntos).
    • Camudar el valor ponderáu de la fase de concursu (40%) y de la fase d’oposición al (60%). (Na actualidá, 1/3 el concursu y 2/3 la fase d’oposición).

Xunta coles CCAA, el pasáu 5 d’ochobre pa tratar tolos temes rellacionaos con estos procesos d’estabilización y tomáronse les siguientes decisiones:

– Coordinación de les convocatories de cada añu. Toes, sacantes País Valenciá, aceptaron aprobar trés convocatories y la execución en cinco años, siguiendo esti calendariu: 2018 y 2020: Secundaria y otros Cuerpos; 2019 y 2021: Cuerpu de maestros; 2022: tolos Cuerpos docentes.  En Galicia, hai alcuerdu col que van convocar tolos años tolos cuerpos docentes.

– El MECD pidió información a les CCAA sobro datos d’interinidá y qué previsiones de places a convocar. Hasta la fecha, namá dalgunes CCAA unviaron estos datos. Nueva xunta con CCAA: el 30 d’ochobre.

– Tocantes a temarios, toles CCAA taben d’alcuerdu en nun camudalos na convocatoria de 2018 y faelo pa les siguientes. El MECD yá ta trabayando nos borradores, que se basen nos de 2012 que nun entraron en vigor.

– Sobro’l cambéu del sistema d’ingresu a la función pública docente, toles CCAA tán d’alcuerdu n’aumentar el valor de la esperiencia docente, pero la mayoría (sacantes trés) proponen que les pruebes sían eliminatories (la mayoría sindical propón pruebes non eliminatories). Pa ello, valdría faer pequeños cambeos nel RD 276/2007.

Per parte de STEs-I:

  • Refugamos que s’argumente que nun hai tiempu p’axustar un nuevu sistema d’accesu a la función docente. Recordamos que na mesa anterior, celebrada’l 28 de xunu, propunximos empezar a negociar en xunetu y dende esi momentu hasta la celebración d’esta mesa trescurrieron cuatro meses.
  • Les Alministraciones incurrieron claramente en fraude de Llei y fueron les responsables de la situación creada al nun ufiertar les vacantes estructurales esistentes. Agora tendríen de ser capaces d’entamar los cambeos lexislativos necesarios pa reparar el dañu de precariedá llaboral causáu al profesoráu interino.
  • Los STEs tuviemos defendiendo un sistema d’accesu estremáu p’acometer esta situación o tamién l’afitamientu por concursu que recueye’l art. 61.6 del EBEP. Entendemos que lo estraordinario de la situación, por aplicación del Alcuerdu de 29 de marzu que nun suscribimos y que’l so conteníu nun aceptamos, xustifica arbitrar procesos d’ingresu estraordinarios que dexen consolidar l’empléu al profesoráu interino. De nun ser asina, esti procesu puede suponer un ERE masivu na educación pública.
  • Hai disparidad de criterios nes distintes CCAA sobro los criterios a emplegar pal cómputu les places a convocar y los plazos d’execución de les convocatories. Ye menester qu’haya criterios más homoxéneos.
  • El R.D. 276/2007 nun val pa esti procesu. Ensin arrenunciar a la nuesa reivindicación d’un accesu estremáu, ye necesariu un sistema transitoriu y escepcional que puede inspirase, ente otres coses, n’aspeutos de los transitorios qu’hubo cola LOGSE y LOE y que, sía que non, faiga amañosu l’accesu a la función pública docente del profesoráu interino. Nesti sentíu, aportunemos en que les pruebes nun sían eliminatories, en dar mayor pesu a l’antigüedá, eliminación de la prueba práctica, la revisión de les titulaciones, etc.
  • Si nun se camuda’l sistema d’ingresu, puede haber miles de persones despidíes y vamos proponer movilizaciones del colectivu interín.

El Ministeriu convócamos a una próxima xunta’l 7 payares. Siguirá axustándose el sistema d’accesu y van apurrinos los borradores de temarios qu’entraríen en vigor nos procesos selectivos a partir de 2019. Dende STEs-I, vamos siguir aporfiando na necesidá d’axustar un sistema d’accesu estraordinariu que dexe consolidar l’empléu al profesoráu interín.

El Secretariáu de SUATEA

30 ochobre 2017

Esta entrada tamién se puede consultar en: Castellanu