Informe 3ª Mesa Sectorial d’Educación col MECD

Esta entrada está disponible en: Castellano (Castellanu)

3a MESA SECTORIAL DEL MECD SOBRO PROCESU D’ESTABILIZACIÓN

Na mañana de güei, 7 de payares, celebróse la tercer Mesa sectorial del MECD p’axustar el procesu de estabilización por aplicación del Alcuerdu pa la meyora del empléu públicu de 29 de marzu y los Presupuestos Xenerales del estáu de 2017.

Per parte del Ministeriu:

  • Consideren que ye vidable que pueda amenorgase la tasa d’interinidá al 8% al traviés d’estos procesos d’estabilización.
  • Aporfíen en qu’estos procesos son pa la estabilización de plantiyes, non l’afitamientu de les persones qu’ocupen les places.
  • Tocantes a los criterios emplegaos poles CCAA al respective de les places a convocar, el ministeriu manifiesta que traten de coordinar a les CCAA ensin imponer.
  • Na Comisión d’Educación de pasáu 30 d’ochobre, na que s’axunten el MECD y les Conseyeríes d’Educación, tomáronse les siguientes decisiones:

– Toles CCAA manifestáronse a favor de los cambeos nel sistema d’accesu que propón el Ministeriu tocante a dar mayor pesu a la esperiencia docente na fase de concursu y al cambéu de ponderación de les fases de concursu y oposición (60% oposición y 40% el concursu).
– Nun había alcuerdu en que les pruebes nun fueren eliminatories, asina que tuvieron que votar y la resultancia quedó asina: 9 territorios (del PP) a favor de les pruebes eliminatories y 8 en contra. Nun quedó claro si’l MECD votó per Cataluña.
– Toles CCAA pidieron que s’esanicie la tasa de reposición.
– La mayoría tán d’alcuerdu na necesidá de coordinase tocantes a places, cuerpos docentes y especialidaes, feches de convocatories, etc.

  • Acepten dellos cambeos propuestos por delles OOSS, pero’l calter de les pruebes nun ye negociable. Apuesten por pruebes eliminatories.
  • Tocantes a los temarios, anque se comprometieren a apurrinos nesta mesa los borradores, afirmen que tuvieron un problema informáticu y que nos los van unviar nestos díes.

 

Per parte de STEs‐I:

Presentáronse alegaciones por escritu onde demandamos voluntá política pa implementar midíes llegales qu’aseguren el trabayu del funcionariáu interino consolidándolo como funcionaríu de carrera.

Apostamos pola estabilización de les plantiyes y de les persones qu’ocupen les places.

Les valoraciones y propuestes fueron les siguientes:

– Demandamos un Accesu Estremáu a la Docencia que respete los requisitos constitucionales d’igualdá, méritu, capacidá y publicidá, o nel so defectu l’aplicación del artículu 61.6 del EBEP.
– Entendemos que lo estraordinario de la situación, por aplicación del Alcuerdu de 29 de marzu que nun soscribimos y que’l so conteníu nun aceptamos, xustifica arbitrar procesos d’ingresu estraordinarios que dexen consolidar l’empléu al profesoráu interino.
– Amosemos el nuesu desalcuerdu con que’l Ministeriu s’escude no que proponen les CCAA pa que les pruebes sían eliminatories. Apelamos a que se tenga en cuenta a la mayoría sindical d’esta Mesa de negociación, que somos los lexítimos representantes del profesoráu y que defendemos mayoritariamente que nun sían eliminatories.

En cuanto al Proyectu presentáu pol MECD, valoramos lo siguiente:

  • Ye manifiestamente insuficiente porque implica una llixeru cambéu del RD 276/2007 na valoración de la esperiencia docente na fase de Concursu y la ponderación de les Fases d’Oposición y el Concursu de Méritos.
  • La Fase d’Oposición nun tendría de ser eliminatoria pa sumar el Concursu de Méritos.
  • Les Fases d’Oposición y de Concursu tendríen de sopesase igual, un 50 % en cada casu.
  • La fase d’oposición tendría de consistir n’una única prueba rellacionada cola práctica docente y nun tendría de tar determinada por pruebes memorísticas basaes n’unos temarios, sinón polos conteníos curriculares de la especialidá, la competencia pedagóxica y el dominiu de les técniques necesaries pal exerciciu la docencia. Sicasí, si los procesos selectivos se desarrollen en base a temarios, proponemos:

– Aumentar el númberu de temes a escoyer.

– Nun incluyir prueba práctica de la especialidá.

– Defensa d’una memoria o programación.

  • Sía que non, nenguna de les partes o pruebes tienen de ser eliminatories.
  • La Fase de Concursu tendría de valorar preferentemente la esperiencia docente previa. La propuesta de l’Alministración (que se queda nun 12.5 % del total) ta bien llueñe de les sentencies emitíes pol Tribunal Constitucional, el 45 % del total. Amás, ye necesario amontar tamién el tiempu de servicios computable.
  • Revisar la equivalencia de titulaciones. Aplicar correspondencies MECES (Marcu Español de Cualificaciones para la Educación Cimera) a los títulos universitarios pre‐Bolonia.
  • La DT 17a de la LOE nun esixe la Fase de Práctiques una vegada superáu’l concursu‐oposición. Ésta nun tendría d’aplicase al profesoráu interino con un mínimu d’un añu d’esperiencia docente previa.
  • Garantizar la tresparencia, oxetividá y ecuanimidá de los tribunales. Reclamación y revisión de toles partes de la fase d’oposición.
  • Garantizar l’anonimatu de les persones aspirantes nes pruebes escrites.

De les propuestes y allegamientos que presentemos los STEs-I, el MECD acepta (en principiu):

  • Que los años computables d’antigüedá aumenten. El MECD propón ampliar a 10 (0.7 per añu).
  • Aumentar el númberu de temes a escoyer.

 

El Ministeriu pretendía cerrar güei la negociación y tuvimos qu’aportunar en que nun se puede cerrar ensin que s’apurra un documentu definitivu nel que se recueyan les aportaciones aceptaes.

Per otra parte, informar que na mañana de güei aprobóse na Comisión d’Educación del Congresu la PNL (proposición non de llei) presentada pol Grupu parlamentariu UNIDOS PODEMOS sobro estos procesos d’estabilización y l’afitamientu del profesoráu interino. Esperamos que finalmente la negociación siga la próxima selmana y qu’esta PNL aprobada mos valga d’ayuda nes nueses reivindicaciones.

Dende STEs‐I, vamos siguir aportunando na necesidá d’axustar un sistema d’accesu estraordinariu que dexe consolidar l’empléu al profesoráu interino.

Madrid, 7 de payares de 2017.

Print Friendly, PDF & Email

Esta entrada está disponible en: Castellano (Castellanu)