Home > Profesoráu > Profesoráu interín > Información sobre Ufierta Pública d’Empléu (OPE)

Información sobre Ufierta Pública d’Empléu (OPE)

Güei, 7 de payares, la Conseyería d’Educación axuntónos en grupu de trabayu por segunda vez nesta selmana pa informar sobre la propuesta d’Ufierta d’Empléu Públicu 2020.  La propuesta inicial presentada’l 14 de payares yera:

–           506 places  (436 d’Enseñanza Secundaria y 70 de profesores Técnicos de FP)

–           175 places d’accesu a otros cuerpos docentes, incluyíos nun subgrupu de clasificación cimera.

–           Amás, plantegaba convocar otres places incluyíes na OEP 2017: 5 places d’Alemán d’Escuela Oficial d’Idiomes y 250 places de promoción interna d’accesu a catedráticos.

L’Alministración, na xunta de güei, propón una medría al respective de la primer propuesta:

–           31 places más al aumentar un 8% adicional sobre les places de la tasa de reposición (392) porque lo dexa la normativa, pasando  asina de les 506 iniciales a un total de 537 places.

Amás, propón aumentar les especialidaes a convocar al respective de la propuesta inicial, añadiendo Filosofía, Inglés, Francés y Cocina y Pastelería. 

–           10 places d’accesu a otros Cuerpos docentes del mesmu grupu o nivel.

–           155 d’accesu a otros cuerpos docentes, incluyíos nun subgrupu de clasificación cimera.

–           7 d’accesu a cátedra d’Escuela Oficial d’Idiomes.

–           3 d’accesu a cátedra del Cuerpu d’Artes Plástiques y Diseñu.

Énte estes novedaes presentaes güei, dende SUATEA quexémonos pola falta de previsión y pola incertidume ya inseguridá que supón pa les persones afectaes, sobremanera no que cinca a la convocatoria de cuatro especialidaes más que nes propuestes va un mes (Filosofía, Inglés, Francés y Cocina y Pastelería).

Magar lo que pidimos dende les Organizaciones sindicales, la Administración nun  va informar del númberu de places por especialidá hasta finales del mes de xineru de 2020, argumentando que hasta esi momentu nun van tener acabáu l’estudiu de les plantiyes pal cursu próximu.

Amás, como asocedió n’ufiertes públiques d’empléu anteriores, SUATEA punxo enriba de la mesa lo que pa nós  son les temes prioritarios: la forma d’accesu a la función pública docente, que consideramos obsoleta y alloñada de la competencia docente, y l’afitamientu y estabilización de los puestos docentes yá esistentes. Polo tanto, énte les Ufiertes Públiques d’Empléu, en vez de considerar que ye la única forma pa consolidar l’empléu, dende SUATEA creemos  que ye imprescindible falar tamién d’una forma xusta d’accesu a esi empléu, que respete los derechos llaborales xeneraos, y tratar d’establecer alcuerdos que garanticen la continuidá de les persones nel so trabayu, independientemente de qu’aprueben les oposiciones. Por eso, planteguemos nestes xuntes que ye menester axustar un nuevu Alcuerdu d’interinidá más garantista pal profesoráu interín asturianu.

Per otra parte, surdió l’alderique y les duldes que xeneren les convocatories de cátedres de distintos Cuerpos docentes, que paez que nun van ser en 2020. L’Alministración nun respuende a entrugues que pa SUATEA son fundamentales: ¿Van ser convocatories estatales o autonómiques? ¿Son promoción interna si pue acceder funcionariáu de carrera d’otres CCAA? En delles CCAA convocáronse a nivel autonómicu como de promoción interna y na documentación que l’Alministración asturiana mos presentó tamién les consideren de promoción interna, sicasí paez que nun ven encaxe llegal a convocales de calter autonómicu. Esto, al nuesu entender, va tener consecuencies negatives pal profesoráu asturiano que quiera acceder a cátedres, pos tendrá de competir tamién con persones d’otres CCAA. Amás, eses persones de fuera d’Asturies qu’accedieren supondríen una medría de plantiya ensin presupuestar, que lóxicamente amenorgaría los puestos ocupaos por profesoráu interino y, poro, les futures Ufiertes d’Empléu Públicu. 

N’Uviéu a 7 d’avientu de 2019. El Secretariáu de SUATEA

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344