Información baremu del concursu tresllaos

Na mañana de güei, 6 de marzu, celebróse una xunta na Conseyería qu’afecta al concursu de tresllaos y que tien que ver cola aplicación del Alcuerdu de puestos calificaos d’especial dificultá”.

La xunta foi convocada a pidimientu de SUATEA en detectando una incorrecta aplicación d’esti Alcuerdu nel baremu del Concursu de Tresllaos. En concretu, afectaría al aptáu. 1.1.3 nel que se computa como méritu la ocupación efectiva d’un puestu d’especial dificultá.

SUATEA pidió aclaraciones sobre esti asuntu de forma repetida y per delles víes dende la publicación del baremu provisional (22 de xineru de 2018). Énte la falta de respuesta y col envís d’evitar inconvenientes a terceros, el día 22 de febreru de 2018 pidióse por escritu y con calter d’urxencia una xunta con cuenta de que se dictaren les instrucciones pertinentes que permitieran correxir les puntuaciones asignaes incorrectamente nel referíu Concursu de Tresllaos.

En dicha xunta, la Conseyería almitió que en Residencies y Aules de Inmersión Llingüística taba otorgándose esti méritu a tol personal docente del centru, lo que consideramos una interpretación espansiva de la cláusula cuarta onde s’especifica, ente otros, que los puestos d’especial dificultá son los siguientes: “c) Tolos puestos docentes que pertenezan a Aules hospitalaries, Aules d’inmersión llingüística, Escueles Hogar y Residencies escolares.” D’esta forma, dende la Dirección Xeneral de Personal Docente almítese que se consideraron d’especial dificultá tolos puestos docentes adscritos a Centros que tienen Aula d’Inmersión Llingüística o Residencia. Pa SUATEA, esta interpretación va en contra de lo espresao na clausa Segunda. – Ámbitu personal, onde diz: “Lo espuesto nesti Alcuerdu va ser d’aplicación al personal docente qu’ocupe de manera efectiva los puestos d’especial dificultá”. Por ello, entendemos que se ta otorgando a dellos funcionarios que participen nel concursu de tresllaos xuna puntuación cimera a la que-yos correspondería, yá que nun desempeñaron nos sos centros un puestu d’especial dificultá.

A pesar de los avisos y pidimientos que tuvimos faciendo dende SUATEA, l’Alministración nun fixo casu de les nueses alvertencies, dexando pasar el tiempu hasta publicar el baremu definitivu del Concursu de tresllaos el pasáu 2 de marzu ensin enmendar esti fallu. Agora escúdense en que ta publicáu’l baremu definitivu y nun ye posible rectificar.

Por too ello, informamos que la Conseyería fixo públicu un baremu, condicionáu por una interpretación particular del Alcuerdu de 27 de xunu de 2016, qu’afecta al resolvimientu provisional del concursu de tresllaos.

Uviéu 6 de marzu de 2018