¿Inclusión o segregación educativa ?

Ye difícil garantizar la inclusión educativa , esi principiu que trescala tola normativa y los discursos políticos, cuando la realidá presupuestaria nun s’afai a tan ambiciosu oxetivu . A saber: que les alministraciones educatives aseguren los recursos necesarios pa disponer del profesoráu de les especialidaes correspondientes y de profesionales cualificaos, lo mesmo que de los medios y materiales precisos pa una atención afayaiza del alumnáu supón evaluaciones, informes y negociaciones constantes.

Dacuando , después de la pandemia, tamién asocedió lo contrario: personal qu’apaez ensin que naide lo solicitara, por obra y gracia de fondos europeos con calter finalist , esto ye, con fecha de caducidá .

Lo que yá nun resulta tan anecdóticu ye la falta de planificación nes

escolarizaciones nueves. Esto ye, cuando yá se conoz, con antelación al entamu del cursu escolar, qué recursos especializaos necesita l’alumnáu y, tovía, les clases empezaron, el 11 de setiembre , ensin ello. Esto ye lo qu’asocedió col auxiliar educativu nel colexu Nuestra Señora de Mérida (Pravia), l’IES Sánchez Lastra (Mieres) y el CP “Darío Freán Barreira” (Cuaña). Los dos primeros centros solucionaron l’asuntu la primer selmana d’ochobre. En Xarrio siguen alantre ensin esti sofitu, esto ye, con munches dificultaes.

L’auxiliar técnica educativa tien, ente les sos funciones: acompañar al alumnáu con necesidaes educatives especiales (ACNEE) nos  desplazamientos, como  na nes  actividaes  rellacionaes  colos  programes  d’autonomía   personal  y  hixene  y  d’enseñanza-aprendizaxe, en  periodu escolar,  pa  cubrir  les  necesidaes  básiques  d’aséu, alimentación  y  descansu del  ACNEE, mirando de que sean autónomos y  garantizando la so seguranza.  Cuando l’auxiliar nun ta, el bienestar del alumnáu y del profesoráu empioren muncho y, per ende, la calidá de la educación queda n’entredichu.

En Xarrio contaben colos preceptivos informes d’escolarización que dictaminaben la necesidá d’un auxiliara educativu, igual que nel IES Galiléu Galilei (Navia). Resulta evidente que la mesma trabayadora nun puede movese d’un centru a otru a demanda – nun se trata de cruciar una cai- cuando surda la necesidá , porque son imprevisibles y nun diba llegar a tiempu. Establecer un horariu compartíu ente dambos dos centros – conceyos, diba dar una atención igual de precaria. Asina que, nel CP Darío Freán tán ensin auxiliar de magar empezó’l cursu, y va pa un mes. De vergüenza.

Suxerir, encamentar o afalar a les families ar qu’escolaricen a les sos fíes y fíos nun centru, que nun-yos correspuende o que nun ye públicu, onde yá hai personal d’apoyu asignáu, en cuenta poner los recursos onde l’alumnáu s’escolaríza nun ye inclusión, ye segregación.

Poro, dende SUATEA esiximos una solución inmediata pal Colexu Darío Freán Barreira y un compromisu firme per parte de l’Alministración pa qu’esti tipu de situaciones nun vuelvan asoceder. Planiar en tiempu y forma los recursos establecíos (aprobaos) ye lo mínimo que s’espera d’una Conseyería tan inclusiva .

N’Uviéu, a 9 d’ochobre de 2023