Home > Centros educativos > Improvisación y falta de criteriu de la Conseyería d’Educación coles beques de los llibros de testu

Improvisación y falta de criteriu de la Conseyería d’Educación coles beques de los llibros de testu

Unviáronse a los centros les instrucciones a siguir na aplicación del programa de préstamu y reutilización de llibros de texto. Otra vuelta la Conseyería carga de responsabilidaes que nun yos correspuenden a les direcciones d’escueles y institutos, imponiendo la execución d’una serie de decisiones con gran trascendencia pal alumnáu y les families que puen ser beneficiaries.

La improvisación y falta de criteriu que nos últimos tiempos caracteriza a la Conseyería d’Educación vuelve a apaecer y nesti caso agravada pol contesto en que se da.

Quedando 15 díis pa rematar el cursu escolar, nun momentu en que la xera alministrativa ye descomanada yá que ca vez hai menos personal y la burocracia aumenta a costa del sobreesfuerzu de los miembros de les direcciones, lleguen unes instrucciones que pretenden sustituyir les esperiencies de “Bancos de llibros” que tán dando frutos en dellos centros. Estes esperiencies riquen d’una planificación y collaboración de la comunidá educativa que nun pue improvisase en 15 díis. La participación de les AMPAs y la disposición de recursos económicos que cubran toles necesidaes de materiales pal alumnáu son daqué ausente dafechu na propuesta que la Conseyería ta acabante de publicar.

Esti asuntu ye especialmente grave si tenemos en cuenta que los llibros solo servirán pa esti cursu si la LOMCE s’aplica como pretende la Alministración educativa que amás prevé resolver la convocatoria ¡nel mes de payares!, cuando yá ta andáu’l primer trimestre y les carencies de recursos de munchos neños y neñes deberíen tar iguaes va meses. Nun podemos escaecer amás que les cantidaes de les que falamos son risibles (105€) teniendo en cuenta’l costu real de llibros y materiales escolares. Dao que nun llega pa too, vuelve a quedar baxo la responsabilidá de los centros qué llibru se compra y cuálu non, constituyendo tou un parche que nun va ser a tapar el furacu de les necesidaes reales na situación económica na que tamos.

Dende SUATEA desiximos la retirada darréu del documentu que s’unvió a les direcciones d’escueles y institutos asina como que se tomen les midíes oportunes pa que la enseñanza pública seya verdaderamente de baldre y la utilización de los llibros de testo nun suponga un elementu de segregación ente l’alumnáu.

POR LA GRATUIDÁ DE LOS LLIBROS DE TESTU

POR UNA ENSEÑANZA PÚBLICA DE CALIDÁ QUE GARANTICE LA IGUADÁ D’OPORTUNIDES PA TOOS Y TOES

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743