Hai un añu de la marcha contra les violencies machistes

El llunes 7 payares de 2016 cúmplese un añu de la Marcha contra les violencies machistes. Esta marcha constitúi un finxu na hestoria del movimientu feminista. Esi día, miles de muyeres de tolos territorios del Estáu confluyeron nun berru común contra les violencies machistes y esi berru fíxose estensivu a tol mundu recibiendo sofitos de los 5 continentes. El movimientu feminista xunióse pa denunciar que les violencies machistes suponen la manifestación más violenta de la desigualdá de xéneru y suponen la más grave violación de los derechos humanos de les muyeres que carez la nuesa sociedá.

Nos diez primeros meses de 2016, les víctimes mortales por agresiones machistes fueron 80. Esti fechu constata que, magar la multitudinaria movilización, nin los partíos políticos, nin los gobiernos, tanto central como autonómicos, tomaron en serio la reivindicación de considerar la llucha contra’l terrorismu machista como una cuestión d’Estáu.

Dende l’Asamblea Añal del sindicatu SUATEA queremos esixir:

1. Que la llucha contra’l terrorismu machista sía una cuestión d’Estáu.

Aumentando les partíes presupuestaries a nivel estatal y autonómicu. Ye necesario aumentar los recursos del Ministeriu del Interior y del poder xudicial, aumentando’l númberu d’ordes de protección policial de les muyeres víctimes de violencia de xéneru, lo mesmo que de  los Servicios Sociales y d’Igualdá.

2. Que tola sociedá y les sos organizaciones ya instituciones se comprometan na llucha contra toles formes de violencia contra les muyeres

Realizando campañes d’información y sensibilización sobre les distintes formes de violencia contra les muyeres y plantegando midíes, realmente efectives, p’atayar los efectos de les violencies sobre les sos víctimes.

Realizando programes de formación pa tol personal que pueda atopase ante un casu de violencia contra la muyer dientro de la so actividá llaboral. Nesos programes tien d’incluyise formación sobre la detección y enfoque nel tratamientu de los distintos tipos  de violencies

3. Protección de les muyeres afectaes y de los sos fíos y fíes, facilitándo-yos salíes de recuperación vital, económica y social.

Estableciendo programes d’ayuda y recuperación psicolóxica que permitan el so empoderamientu, que vaigan acompañaos d’ayudes pa la busca d’empléu y ayudes que-yos faciliten la so independencia económica.

4. Que la prevención sía una política prioritaria, qu’incluya la coeducación en tolos niveles educativos como ferramienta básica na llucha contra les violencies machistes.

Realizando una formación real y eficaz pal profesoráu de tolos niveles educativos.

Enllantando programes de prevención nos distintos niveles educativos y encetando’l tema de les violencies sobre les muyeres nos currículos de toles asignatures como midida de concienciación y primer pasu pal so esaniciu nes xeneraciones más nueves.

Xixón, 4 payares de 2016