Home > Comunicaos > Hai que revertir los recortes

Hai que revertir los recortes

La Plataforma Estatal pola Escuela Pública denuncia la falta de voluntá política del Ministeriu d’Educación pa revertir los retayos n’Educación y avanzar nel Pactu educativu

La Plataforma Estatal pola Escuela Pública denuncia la falta de voluntá política del Ministeriu d’Educación pa recular nos retayos n’Educación y pa avanzar nel Pactu educativu. La Plataforma estatal pola Escuela Pública esixe al Ministeriu d’Educación, d’una vez por toes, la reversión de los retayos que tán afectando gravemente al sistema educativu del nuesu país. Nos últimos años la enseñanza pública sufrió un deterioru importante qu’esti Gobiernu nun paez querer atayar. El Ministru Méndez de Vigo refuga la so responsabilidá, amparándose nun futuru Pactu educativu mientres nun da respuestes a los verdaderos problemes del día a día nos centros: implantación de la LOMCE, aumentu de la ratio, aumentu del horariu llectivu del profesoráu, falta de cobertoria de les sustituciones, perda de plantiya nos centros docentes, amenorgamientu de beques y ayudes pa l’alumnáu, amenorgamientu de recursos nel funcionamientu de los centros, ausencia d’atención a la diversidá, nula inversión n’infraestructures y materiales escolares, son solo la punta del iceberg de los derechos perdíos na enseñanza.

El titular del departamentu refugó la so responsabilidá de liderar l’alderique educativu delegando esta xera na Subcomisión del Congresu qu’amplió los plazos del so resolvimientu, paralizando asina l’alderique y la meyora normativa que tendría de tar yá enriba  la mesa, amosando asina, la so falta de voluntá política. Esta apatía y desinterés demuestren que la educación nun ye prioridá pa’l Gobiernu del PP.

El diálogu cola Comunidá educativa tendría de ser, a xuiciu de la Plataforma Estatal pola Escuela Pública, el  puntu de partida para da-y vuelta a esta situación. El MECD tendría de concenciase de qu’invertir n’educación ye invertir en futuru y actuar en consecuencia, aumentando les partíes destinaes a esti sector y negociando una nueva Llei educativa que respuenda a les verdaderes necesidaes del sistema educativu.

Por ello, la Plataforma Estatal pola Escuela Pública considera fundamental la derogación de la LOMCE y la recuperación de los derechos perdíos y fai un llamamientu al conxuntu de la comunidá educativa pa que sofite esta iniciativa, ensin escartar poner en marcha otru tipu de movilizaciones unitaries,  con cuenta d’impulsar les meyores que demanda la nuesa educación.

 

Madrid, 9 d’ochobre de 2017.

Esta entrada tamién se puede consultar en: Castellanu