Graves problemes na planificación educativa del Asturianu

Nes axudicaciones de profesoráu interino de güei, 24 d’ochobre de 2019, faen rescamplar un grave problema de planificación eductativa no que cinca a la enseñanza del asturianu nel cuerpu de profesoráu de Secundaria que se repite añu tres añu. Siguen ensin cubrise dende primeros de cursu cuatro vacantes pa tol añu a media xornada: I..E.S El Sueve de Les Arriondes, C.P.E.B. de La Puela Allande, I.E.S. Cangas del Narcea y C.E.P.A. d’Uviéu. A ello súmase-y la non cobetoria de sustituciones: I.E.S. “ISLA DE LA DEVA” en Piedras Blancas, I.E.S. “Ramón Areces” en Grao y I.E.S. de L’Infiestu.

Poro, un carretáu d’alumnáu qu’escoyó recibir esta materia ve conculcáu’l so llexítimu derechu como consecuencia d’una falta gravísima de planificación alministrativa dada la recurrencia del problema.

Amás, el profesoráu de Secundaria pa poder dar clas d’Asturianu tien de cursar el Máster universitariu en Formación del Profesoráu d’ESO, Bachilleratu y Formación Profesional pola especialidá de Llingua Asturian. Hasta l’añu pasáu solo s’ufiertaben nel Máster 5 places, lo que sumao a que nun dexaben matriculase a les persones que yá lu cursaren por otra especialidá torgó enforma l’habilitación de más profesoráu. Esti problema na formación del profesoráu fue puestu por SUATEA en conocimientu del Vicerrectoráu d’Ordenación Académica y la Directora Xeneral d’Universidaes consiguiendo’l compromisu d’ampliar les places a 10 y la eliminación del requisitu de nun haber cursao’l Máster por otra especialidá. Sicasí tamos viendo qu’estes midíes nun abasten pa p’acabar col problema.

Magar qu’esisten llistes y bolses con profesoráu d’esta especialidá (la última bolsa constituyóse’l 27 payares de 2018 con diez persones), les places nun son escoyíes. Ello débese a que les persones que les constitúin yá tán trabayando per otres especialidaes, tienen perspetiva de garrar places más cerca casa (el 80% la población asturiana concéntrase nel centru d’Asturies y polo tanto col profesoráu pasa lo mesmo) o, fundamentalmente, porque les places ufiertaes son a media xornada amás de tar lloñe de la so residencia. Esto último trai como consecuencia unos gastos de tresporte, manutención y residencia que malpenes se son a pagar col sueldu recibíu (unos 800€ netos).

La riestra de factores que torguen que se cubran los puestos de Llingua Asturiana son bien conocíos pola Conseyería Educación y d’ellos informemos a la nueva Conseyera d’Educación nel conceyu billateral que tuviemos esti llunes enantes de salir la convocatoria places. De la non cobertura de puestos hai munchos antecedentes de cursos pasaos y síguese na mesma dinámica ensin tomar les midíes afayadices. Dende SUATEA proponemos:

• Aumentar les places del Máster p’afayales a les crecientes necesidaes de cobertura places de porfesoráu de Llingua Asturiana y abrir les bolses de personal interino d’esta especialidá a últimos de cada cursu pa cuntar con más personal pal siguiente.
• Potenciar el Minor de Filoloxía y la Mención nel Grau de Mestros.
• Reconocer la especialidá de Llingua Asturiana y Gallego-Asturianu, convocar oposiciones, estabilizar al profesoráu interino y cubrir les places con Funcionariáu de Carrera per aciu’l concursu de tresllaos.
• Merma significativa de les medies xornaes nesta y otres asignatures per aciu una bona planificación, sobre too nes fasteres alloñaes del centru d’Asturies.
• Ufiertar estabilidá a tol profesoráu interino de los centros rurales con contratos de llarga duración, lo que valdría pa tener plantiyes estables nesos centros.

El Secretariáu de SUATEA

N’Uviéu a 24 d’ochobre de 2019