Fuelga feminista 8M: la fuelga más necesaria

L’añu pasáu, la (in)xusticia patriarcal dionos sobraos motivos pa tomar les cais. El casu de Juana Rivas y la sentencia de “La Manada” evidenciaron los cimientos machistes sobro los que s’asitia’l sistema xudicial. Per primer vegada, munches muyeres garraron conciencia de lo que significa estructura patriarcal o violencia estructural. Esto provocó concentraciones nes Audiencies Provinciales y otres sedes xudiciales col envís d’esmazcarar los cimientos patriarcales del sistema y esixir los cambeos lexislativos necesarios pa sentinos realmente amparaes pola xusticia. Nesti puntu, convien recordar que nel Estáu español produzse un casu de violación cada ocho hores y que nun tamos dispuestes a siguir consintiendo que los culpables gocien de los privilexos d’un sistema qu’abarata condenes, mientres revictimiza a les muyeres. Ye urxente correxir la escasa o nula formación especializada que tien, na mayoría de los casos, el personal qu’atiende a les víctimes.

La presión exercida al traviés de toes estes concentraciones forzó a los grupos parlamentarios a aprobar por unanimidá una enmienda a los presupuestos xenerales que devolvía Pacto de Estado contra la Violencia de Género los 200 millones d’euros alcordaos primeramente en llugar de los 80 a los que lu amenorgaren.

2018 foi tamién l’añu en que SUATEA, xunto coles secretaríes y árees de la muyer de los STEs y otres organizaciones feministes, participó na ellaboración del Informe Sombra al Convenio Estambul sobro prevención y llucha contra la violencia contra les muyeres y la violencia doméstica. Esti Conveniu, ratificáu pol Gobiernu d’España en 2014, suponía l’asunción d’una serie de midíes sociales y lexislatives que teníen de ponese en marcha nun plazu de cuatro años. Sicasí, según l’analís realizáu poles organizaciones feministes, l’Estáu Español incumple la mayoría de los compromisos adoptaos, en cuantes que la mayoría d’eses midíes nun llegaron a asoleyase.

Nel planu internacional, el resurdir del movimientu feminista manifestóse n’Estaos Xuníos énte l’ascensu de Donald Trump a la presidencia cola Women´s March, pa denunciar la misoxinia amosada descaradamente por esti individuu. Dende 2017, millones de persones tiren añalmente pa escontra Washington en señal de protesta. Na mariña oeste, les actrices de Hollywood promovieron la campaña #MeToo pa denunciar los abusos sexuales que sufríen de los sos compañeros d’oficiu. Ye probable que toos estos movimientos facilitaren que, per primer vegada na so hestoria y nuna cámara de mayoría republicana, la presencia de les muyeres supere a la de los homes.

N’Irlanda llegalizóse la interrupción del embaranzu y n’Arxentina, magar de nun consiguir l’aprobación del Senáu, llogróse llevar l’alderique al senu del Gobiernu y de la Nación. Dende equí, el nuesu sofitu y sororidá.

Sicasí, esti resurdir feminista esmazcaró’l machismu estructural d’una sociedá que reacciona de forma bederre agora que ve taramellar los sos privilexos, y asina lo demuestra al traviés de continuos ataques a los derechos adquiríos poles muyeres tres años d’incesante llucha. Esti rearmamientu del patriarcáu, favorecíu polos partíos políticos de dereches y amparáu polos sos abogaos cristianos y comparses mediátiques, ye feroz. Veanse los planes del presidente del Partíu Popular pa repoblar ¡España! y otros discursos igualmente retrógrados que deformen la realidá pa salvaguardar los sos intereses machistes. Discursos que pueden causar estragos nuna sociedá que nun foi educada pa la igualdá y contra la violencia, y que, polo tanto, nun adquirió les conocencies necesaries pa prevenir los sos ataques, nin desenvolvió la conciencia crítica necesaria p’alvertir la so toxicidá.

Nesti contestu, dende SUATEA y la Organización de Muyeres de la Confederación Intersindical convocamos la Fuelga Feminista 8M de 2019 de 24 hores y animámosvos a secundala pa esixir el cumplimientu inmediatu de les 23 midíes recoyíes na EXA 1, puntu 1.1. del Pactu d’Estáu contra la Violencia de Xéneru, asina como l’impulsu de la formación que garantice programes formativos especializaos en prevención de la violencia a profesionales de la educación (EXA 5, DGVG nº230), la inclusión d’indicadores de siguimientu de les actuaciones de la Inspección Educativa tocante a los planes d’igualdá nos centros d’educación primaria y secundaria obligatoria (EXA 6, *DGVG *nº 239), y el diseñu de programes de prevención, detección y protocolos especializaos n’atención y actuación afaciéndolos a les especificidaes de les distintes violencies sexuales. Tamién esiximos que se desenvuelvan protocolos d’intervención y detección precoz en tolos ámbitos de la Educación Intantil, Primaria, Secundaria, amás del ámbitu universitariu (EXA 8, DGVG nº 254).

Nun pidimos la lluna, solo la coeducación. Como dixo una compañera: ¡FEMINISMU O BARBARIE!