Home > Aición sindical > Frente al maltratu salarial, homologación

Frente al maltratu salarial, homologación

Güei, vienres 10 de mayu, axuntáronse na Conseyería d’Educación los grupos de trabayu que surdieron depués del alcuerdu del pasáu mes de payares. D’aquel alcuerdu surdieron dos grupos, unu dedicáu a analizar la carga de trabayu burocráticu que soporta’l profesoráu asturianu y otru centráu en “les posibilidaes d’ampliación del plan d’evaluación de la función docente”.

Nesti últimu grupu de trabayu, SUATEA denunció la esistencia d’una discriminación salarial del profesoráu asturianu en comparanza colo del restu l’Estáu, que nos  asitia nel llugar más baxu en Secundaria y antepenúltimu en Primaria. Les diferencies salariales concrétense, en munchos casos, en más de 300€ mensuales en profesoráu con hasta 5 años d’antigüedá.

Pal nuesu sindicatu, lo que debería de tar enriba de la mesa ye la busca de fórmules siguíes por otres comunidaes autónomes que nun condicionen la xuba salarial del profesoráu al xantaxe de la evaluación docente y garanticen  una xuba consolidable  que nos homologa con elles . Sicasí, tanto l’Alministración como los sindicatos ANPE y UXT aportunen y prioricen  la vía de la carrera profesional  o los planes d’evaluación docente como única escapatoria al maltratu salarial.

Resulta chocante que, igual  que n’ocasiones anteriores, se repita l’apertura d’esti alderique en plena seca salarial coincidiendo col procesu electoral asturianu. La nuesa Alministración pretende vender el so espíritu negociador dempués de cuatro años de inacción absoluta en materia salarial: non solo nun contribuyó a ameyorar los nuesos salarios, sinón  qu’agora apúntase a siguir modelos neolliberales de pagos condicionaos a la productividá a imitación de les puestes apocayá en marcha pol gobiernu del PP en Castiella y Llión. Igualmente resulta llamentable y chocante qu’otros sindicatos plantegen esta vía punitivo-evaluadora como la prioritaria para llograr la esperada y merecida medría retributiva. Frente a esta vía muerta, lenta, discriminatoria, non consolidable, que dexa la introducción de práctiques neolliberales que condicionen el salariu a una evaluación de la función docente y la so productividá, SUATEA propunxo la vía rápida de la homologación  con otros territorios por aciu la medría llineal ya igual para tolos cuerpos docentes de les retribuciones que percibe’l profesoráu asturianu al traviés d’un complementu autonómicu.  Si’l Partíu Socialista quier faer efectiva esta xuba salarial va poder faelo darréu si gobierna na próxima llexislatura y  ensin mediar nengún artiluxu, a cencielles: emplegando les competencia de les que dispón.  Ello contribuyiría descomanadamente a prestixar el nuesu oficiu.

El Secretariáu de SUATEA

N’Uviéu a 10 de mayu de 2019

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344