Estabilización del personal interino: SÍ SE PUEDE

Esta entrada está disponible en: Castellano (Castellanu)

Na tarde d’ayeri, 11 de payares, publicóse la noticia d’un alcuerdu ente’l Gobiernu del PSOE Xuníes Podemos y los grupos parllamentarios d’ERC y PNV pa dar n’estabilizar nel empléu al personal interino de l’Alministración que lleva dende 2016 (más de 5 años) ocupando’l mesmu puestu de trabayu. Esti alcuerdu esclúi temporalmente a los sectores d’Educación y Sanidá que van disponer d’un añu p’axustar l’adaptación del mesmu a les condiciones específiques del so ámbitu.

Dende SUATEA tenemos que manifestar qu’esta propuesta nun ye la solución pola que venimos trabayando dende va tiempu pero creemos que supón un cambéu importante que cuestiona’l dogma oficial defendíu polos sindicatos mayoritarios hasta agora de que la única vía d’accesu a la función pública ye la oposición y el concursu-oposición.

Como sindicatu esploremos dos víes, per un llau la xudicial, que nun dio resultaos satisfactories nel so momentu, pero que sigue abierta teniendo en cuenta les novedaes xurídiques; y, per otru llau, la vía del contactu y conversaciones con distintos grupos parllamentarios pa forzar el cambéu llexislativu. Por citar delles iniciatives, la primavera pasada participemos nes xornaes d’alderique que tuvieron llugar nel Senáu colos diversos grupos parllamentarios; entamemos movilizaciones con otros sindicatos llegando a convocar una xornada de fuelga previa a la firma del RDL 14/2021 de 6 de xunetu (conocíu como “icetazo”) pa forzar el refugu énte lo que, albidrábamos, diba suponer un ERE en tola función pública. Dempués, pel branu ellaboramos enmiendes a esi RDL y trabayemos colos grupos parllamentarios del Congresu pa buscar el so sofitu. Apocayá, a últimosdel mes d’ochobre convocamos otra fuelga, coincidiendo col desenvolvimientu de les negociaciones nel Parllamentu pa convalidar del RDL.

SUATEA llamó a la movilización en condiciones bien difíciles, marcaes pola pandemia, que nos torgaron visitar los centros pa convocar asamblees nes qu’informar de les amenaces qu’acechen al personal interino, en contra de los mensaxes desmovilizadores d’otres OOSS que nos acusaben de vender fumu y de faer propuestes illegales, al empar qu’aselaben al personal docente argumentando qu’estes midíes nun afectaríen a educación.

Tres la firma del “icetazo”, estos sindicatos entamaron a camudar los argumentos hacia soluciones entemedies que matizaben el so discursu. Col Alcuerdu fechu públicu’l 11 de payares, polo menos van tener que reconocer la esistencia d’otres posibilidaes hasta agora refugaes.

Somos conscientes de que tamos énnte un Alcuerdu nel qu’esiste muncha lletra pequena que tenemos qu’estudiar. Vaiga per delantre que se reconoz la necesidá d’abrir un periodu d’adaptación a los sectores docente y sanitariu.

Sía que non, queremos aportunar na necesidá de caltener la movilización porque va ser nesta fase de concreción del alcuerdu cuando tengamos que doblar los nuesos esfuerzos pol afitamientu del profesoráu interín, pa qu’esa concreción sectorial se fáiga siguiendo la fueya de ruta de la consolidación de quien lleva más de 3 años. Solo la llucha va consiguir torgar que s’impongan soluciones entemedies que nun resuelvan el problema d’acordies colos parámetros europeos (Directiva EU 70/1999). Va haber que buscar una solución pa consolidar tamién al profesoráu d’asturianu y gallego-asturianu, especialidaes inesistentes na plantiya docente, que siempres tuvo condergao a la precariedá de la contratación temporal. Poro, vamos siguir aportunando en que lo que pidimos ye lo más xusto y cenciello: treslladar al sector públicu lo que ye d’obligáu cumplimientu nel priváu en materia de contratación.

Queremos faer un reconocimientu a tol personal interino que vien movilizándose contra vientu y marea. Demostremos que les coses pueden camudar y que nun fueron dar voces en castañéu.

A lo último, queremos denunciar, otra vuelta, l’actitú irresponsable d’aquellos sindicatos (CCOO, UXT y CSIF) que roblaron, nel añu 2017, el Plan de Estabilización nel Empléu. Nesti tiempu caltuvieron una actitú d’incomprensión dafechu hacia lo que taben entamando: la ufierta de places por aciu procesos selectivos de llibre concurrencia y resultáu inciertu, que poníen en peligru los derechos llaborales adquiríos pol personal interino en situación d’abusu, tal que reconocen los pronunciamientos europeos.

Uviéu, 12-XI-2021

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757