Estabilidá pal profesoráu interino

LES RECINTES SENTENCIES EUROPEES REFUERCEN LES DEMANDES DE SUATEA Y DE LA PNL APROBADA POL PARLAMENTU ASTURIANU ESIXENDO LA NEGOCIACIÓN D’UN NUEVU ALCUERDU DE PROFESORÁU INTERINO.

El Conseyeru tendrá de responder mañana en see parlamentaria

El Parlamentu asturianu, concretamente la so comisión d’Educación, va encetar mañana’l porqué de la non aplicación de la PNL aprobada pola Xunta Xeneral  demandando la negociación d’un nuevu alcuerdu de profesoráu interino. Por ello, SUATEA vuelve convocar al colectivu a una asamblea-concentración p’analizar la situación tres les sentencies recientes de los Tribunales Europeos que refuercen les nueses esixencies y les de la Xunta Xeneral.

Dende SUATEA llevamos  años espresando la nuesa esmolición pola creciente precariedá ya inestabilidá de les plantiyes docentes n’Asturies. Más de trés mil  profesores sufren cada añu’l despreciu de l’Alministración, camudándolos  de puestu de trabayu, o inclusive siendo despidíos, cuando les necesidaes qu’atienden son permanentes. L’alumnáu y la comunidá educativa polo xeneral sufren esta falta d’estabilidá que se traduz inclusive en qu’hai centros que camuden a tol so profesoráu d’un cursu pa otru y qu’al entamu del mesmu nun tienen nin siquier equipu directivu.  La situación ye insostenible pues les tases d’interinidá tán en redol al 30%.

L’Alcuerdu de profesoráu interino suscritu pola Alministración y ANPE y UXT  xeneró tal cantidá de problemes nos dos cursos nos que foi aplicáu que cada vez ye más evidente que tien de ser modificáu per mediu d’una nueva negociación, como demanda’l Parlamentu Asturianu. Esti alcuerdu ta basáu na rotación nel empléu, daqué qu’acaba de ser declarao contrario a dereches de la Unión Europea.

N’efectu, el Tribunal Européu entiende que “nun va poder tratase los trabayadores con un contratu de duración determinada d’una manera menos favorable qu’a los trabayadores fixos comparables namás pol fechu de tener un contratu de duración determinada” y “que los nomamientos de duración determinada nun pueden anovase pa desempeñar funciones permanentes y estables incluyíes na actividá normal del personal estatutario fixo”. Amás, denuncia que l’Alministración pública del Estáu Español, y poro l’asturiana, escarez de lexislación que la obligue a crear puestos estructurales, lo que-y dexa abusar de la ufierta repitida pa la so cobertoria de places en réxime d’interinidá, colo que la situación de precariedá de les/los trabayadores conviértese en permanente.

Por ello, SUATEA esixi al Gobiernu asturianu la inmediata apertura de negociaciones d’un nuevu Alcuerdu d’interinidá qu’acabe cola rotación  nel empléu y la inmediata convocatoria de la Mesa Sectorial d’Educación onde s’encete la tresposición de la xurisprudencia europea pa llograr l’allampada estabilidá d’esti colectivu.

El Parlamentu asturianu yá se manifestó pa que s’abra una negociación sobre Profesoráu Interino. El Conseyeru d’Educación tien na so mano aplicar lo esixío pol Parlamentu asturianu y d’esta manera afaer el nuevu Alcuerdu a la sentencia de los tribunales europeos.

Secretariáu de SUATEA

3 d’ochobre de 2016