Home > Comunicaos > Esiximos l’afitamientu del empléu interín

Esiximos l’afitamientu del empléu interín

ÉNTE LA POSIBILIDÁ DE DESPIDOS, SUATEA CELEBRÓ XUNA ASAMBLEA Y CONCENTRACIÓN DE PROFESORÁU INTERINO

SUATEA celebró asamblea de Profesoráu Interino güei, miércoles 24 de mayu, nel IES Fleming d’Uviéu p’analizar l’”Alcuerdu pa la meyora del empléu públicu” alcanzáu ente’l Ministeriu de Facienda y dellos sindicatos, asina como los artículos 19.1 y 19.2 del proyectu de Presupuestos Xenerales del Estáu. Tres esa Asamblea, los asistentes celebraron una concentración de profesoráu interino énte la Xunta Xeneral del Principáu.

El Proyectu de Presupuestos Xenerales del Estáu (PXE) de 2017 contién un artículu, el 19, y especialmente l’apartáu 2, qu’espertó una gran molición ente’l personal interino de les Alministraciones (funcionarios, personal llaboral y estatutario) y empreses públiques. Esi artículu contempla, ente otros aspeutos, que la duración d’un nomamientu o contratu del personal interino nun va poder superar los trés años, nin podrán encadenase socesivos contratos o nomamientos cola mesma persona por un periodu máximu de trés años. De la llectura lliteral d’esi artículu, deduzse’l despidu masivu de trabayadores interinos de toles alministraciones y empreses públiques que tengan contratos o nomamientos de más de trés años, lo que podría afectar nesti momentu a mamplén de persones. Nel ámbitu educativu, afectaría a unes trés mil persones n’Asturies.

L’artículu 19 del Proyectu de los PXE ye una consecuencia directa del Alcuerdu robláu’l pasáu 29 de marzu ente CCOO, FeSP-UXT, CSI-F y el ministru Montoro sobro les ufiertes públiques d’empléu estraordinaries pa los próximos años, colo que pretenden amenorgar la tasa d’interinidá actual, que supera’l 20%, hasta’l 8%. Ello ye que l’artículu 19, nel so apartáu 1, ye la tresllación d’esi Alcuerdu a los presupuestos; y l’apartáu 2, la consecuencia del mesmu. De too ello infierse que, nel 2020, el personal interino que nun llograra superar los procesos selectivos que se convoquen nestes ufiertes d’empléu estraordinaries non yá va perder cualquier posibilidá de consolidar el so empléu, sinón que va ser despidíu si superó los trés años de contratu o nomamientu.  Énte l’alarma xenerada ente’l personal interino de les distintes alministraciones y empreses públiques, la mayoría de los partíos políticos, incluyíu’l PP, presentaron distintes enmiendes al apartáu 19 de los PGE, pero nenguna d’elles adonda la molición nin ufierta una salida que respuenda a los intereses del personal afectáu.

Estes midíes y decisiones adoptaes pol gobiernu y los sindicatos firmantes del Alcuerdu deriven de les sentencies que xurden del Tribunal de Xusticia de la Unión Europea (TXUE) y, siguiendo los dictaos del TXUE, distintos  tribunales españoles dictaminaron que los sistemes de contratación podríen dar pie a plantegar fraude de llei nes contrataciones de personal interino realizaes pola Alministración y provocar el planteamientu d’una cuestión prexudicial que fuera favorable a la estabilidá nel empléu d’esti colectivu. Agora bien, la interpretación que realizaron el gobiernu y los sindicatos de toa esta xurisprudencia nun va empuesta al afitamientu nel empléu dempués de trés años de serviciu, tal como tuviera d’inferise d’estes sentencies, sinón al despidu masivu de tol personal eventual ya interino tres trés años de contratu.

Dende SUATEA y la Confederación Intersindical, consideramos que los sindicatos firmantes del Alcuerdu, al aceptar estes ufiertes masives d’empléu públicu ensin establecer mecanismos específicos d’afitamientu d’empléu del personal eventual ya interino, nun cubicaron les consecuencies que puede traer pa emplegaos y emplegaes qu’ocupen les places. Si l’Alministración convoca oposiciones al traviés de sistemes d’accesu convencionales y nun contempla opciones específiques pal personal eventual ya interino qu’ocupa esos puestos, va tar en riesgu la continuidá nel sistema de too el personal afectáu.

Por ello, sollertemos al profesoráu interino sobro les repercusiones que puede tener una masiva ufierta pública d’empléu col actual sistema d’accesu y el vixente alcuerdu d’interinos n’Asturies. Amás, tamos desenvolviendo una campaña de denuncia d’esta situación que supunxo que dellos grupos políticos presentaren enmiendes a los artículos citaos y faer qu’hasta’l mesmu PP se enmiende a sigo mesmu cola presentación d’una nueva redacción d’esti articuláu.

Lo cual amuesa a les clares les razones de SUATEA pa dar la voz d’alarma. Pero’l nuevu redactáu que conocemos de los citaos artículos nun garantiza la estabilidá hasta l’accesu a la función pública y sigue pesando como una llábana la posibilidá de despidos masivos nel sector docente a partir del añu 2020.

Énte esta situación cambiante na tramitación de los PXE – gracies a la presión de SUATEA, la Confederación de STEs a la que pertenecemos y otres organizaciones–, na asamblea y concentración esiximos l’afitamientu del empléu interín, la negociación d’un accesu estremáu d’esti colectivu a la función pública docente y la estabilidá pa tol profesoráu interino asturianu hasta’l so ingresu definitivu.

N’Uvéu a 24 mayu de 2017

El Secretaríau de SUATEA

Esta entrada tamién se puede consultar en: Castellanu