Home > Comunicaos > Esiximos la construcción d’otru IES nuevu en La Corredoria

Esiximos la construcción d’otru IES nuevu en La Corredoria

LA PLANIFICACIÓN EDUCATIVA RELLUMA POLA SO AUSENCIA NEL CENTRU D’ASTURIES

SUATEA ESIXE LA CONSTRUCCIÓN URXENTE D’UN NUEVU IES NA CORREDORIA

Apocayá, el Conseyeru d’Educación anunció que dos IES van abrise nos próximos años na zona centro asturiana. Unu d’ellos na Urbanización la Fresneda, onde la so construcción paez inminente y otru na Corredoria, que vendría xunise al yá esistente. La construcción d’esti postreru, si reparamos los datos d’escolarización apurríos pola Alministración a primeros de cursu ye xuna urxencia vital pa esti populosu barriu uvieín, que güei concentra la mayor medría de población d’Asturies.

En realidá l’abandonu d’esta zona n’espansión dafechu y crecedera amuesa la falta de planificación de los últimos gobiernos que nun escucharon la demanda de les comunidaes educatives de los Colexos ya Institutu de la Corredoria.

Les cifres son alarmantes: A día de güei hai casi 1900 alumnos y alumnes escolarizaos nos trés colexos de primaria. Nel Carmen Ruiz-Tilve yá hai 465 pero nos próximos cursos pue algamar cifres d’escolarizacón asemeyaes a les del CP la Corredoria, con 662 alumnos y alumnes o a les del CP Poeta Angel González que tien 754. Too ello según datos facilitaos pola Conseyería a primeros de cursu.

Y nel IES, namá en 1u d’ESO, hai 8 grupos con 190 alumnos y alumnes. Esa llinia 8 va dir espardiéndose a los cursos cimeros nos próximos años. Amás, dientro de dos cursos l’alumnáu qu’agora acaba 4u del CP Carmen va concluyir 6 u de Primaria y van pasar al Institutu agora mesmo acorrompináu. Güei hai 74 neños y neñes en 4 u de Primaria nesi Colexu. Esto ye, va haber trés grupos más que vendríen sumase a los que vienen de los otros dos centros.

Por ello ye vergonzoso que la Conseyería d’Educación y l’anterior Conceyu d’Uviéu tuvieren trespasando’l problema d’unu a otru. El problema entós va presentase de forma inminente y la solución nun pue ser otra vegada someter al barriu a que la so mocedá acabe atarraquitao n’aules o en barracones.

Por establecer una comparanza col centru de La Fresnea, el CP d’esta urbanización cunta güei con 416 alumnos y alumnes. Los Institutos cercanos cunten con 570 alumnos el de Posada de Llanera y l’Asturies de Llugones 546.

El gobiernu asturianu tien qu’adoptar midíes d’urxencia p’acelerar la construcción d’un segundu IES en La Corredoria. Esa tien de ser la prioridá absoluta nesti momentu. Si nun se fai asina, los responsables políticos d’esti trafullu van tener que responder énte tola sociedá asturiana.

A nun ser que lo que se pretenda sía favorecer a los centros privaos que colos sos autobuses taríen encantaos de recuperar l’alumnáu que tán perdiendo últimamente.

Uviéu, 25 de mayu de 2017

Esta entrada tamién se puede consultar en: Castellanu