Home > Comunicaos > Esiximos a la Conseyería Educación que nun obligue al profesoráu a dir a los centros educativos

Esiximos a la Conseyería Educación que nun obligue al profesoráu a dir a los centros educativos

Dende SUATEA estimamos que se tomara la decisión d’incluyir a tolos centros educativos d’Asturies nes midíes preventives frente al coronavirus. Sicasí, pa SUATEA resúltanos inalmitible que s’obligue a los equipos directivos de los centros educativos a tomar decisiones que perpasen les sos obligaciones y competencies, puos son Salú Pública y la Conseyería d’Educación quien tienen que tomar decisiones d’esta triba.

Dende’l puntu de vista llaboral y la nuesa función docente, obligar al personal a dir al centru, como norma xeneral, nun tien nengún xacíu, pues al nun tar presente l’alumnáu, el so trabayu fundamental, que ye enseñar interactuando coles persones, ye imposible de realizar. Pa cumplir col nuesu cometíu utilizando la enseñanza a distancia sedría necesariocuntar con abondes máquines TIC nos centros, abonda estabilidá y velocidá pa trabayar toos/ es al empar, asina como disponer de plataformes y programes aplicables por tolos/les docentes: anguaño eso nun asocede. Amás non tol profesoráu ta formáu neses tecnoloxíes y programes. Tampoco se puede universalizar esa metodoloxía a tolos niveles, los más básicos d’Infantil y Primaria, nun tienen l’autonomía abonda, nin les conocencies, nin los hábitos procedimentales pa basar el so aprendizaxe y educación solo nesta metodoloxía. Tampoco tol alumnáu tien los recursos tecnolóxicos necesarios nes sos cases p’acceder a esti tipu d’enseñanza. Poro, colos medios colos que cuntamos, lo más que somos a faer la mayoría de docentes ye proponer telemáticamente delles actividaes de refuerzu o ampliación al traviés del corréu o dalgunes aplicacines de móviles segures: pa ello y pa la nuesa coordinación nun ye necesaria la nuesa presencia física.

Analizando les midíes dende’l puntu de vista de preservación de la salú del profesoráu y de la comunidá, munches d’elles resulten incongruentes y lesives por ponela en peligru innecesariamente:

• Nun tienen en cuenta los encamientos del personal médico, resalvando’l peligru d’andanciu per contactu con superficies infectaes. Los ordenadores, meses, tablets, maniyes, puertes, baños… nun fueron desagafaos antes d’obligar l’asistencia del personal a los sos centros de trabayu.

• Non tol profesoráu tien nel centru un ordenador individual: allegar a les aules d’ordenadores pa trabayar a comuña nun respeta les distancies mínimes prescrites.

• La mayoría del profesoráu mora nel centru de Asturies, zona de mayor infección, y ye obligáu a allegar a llugares onde inda nun tán afectaos, contribuyendo asina a esparder la epidemia.

• Son motivos d’escusa’l tar en contactu con dalguna persona afectada, tener necesidá de curiar a familiares, tar los familiares o los mesmos/as trabayadores en situación de riesgu. Situaciones toes elles difíciles de xustificar.

• Ante una pandemia qu’esixe midíes preventives perclares y estremes adoptaes poles autoridaes de la Salú, nun correspuende a la función directiva la responsabilidá de flexibilizar o afaer, dudosos cuando non incongruentes, protocolos de salú encamentaos pola Conseyería d’Educación.

Teniendo en cuenta toles circunstancies anteriores y que’l principiu de prevención y el derechu a la salú de tolos miembros de la comunidá educativa, tamién del profesoráu, tienen de priorizase, dende SUATEA esiximos a la Conseyería d’Educación que nun obligue al profesoráu a dir a los centros educativos. El teletrabayu ye la única manera de compatibilizar el Derechu a la Salú de los/el trabayadores y la comunidá col Derechu a la Educación del alumnáu.

N’Uviéu a 13 marzu de 2020

ENTRADES ANTERIORES COVID-19 y EDUCACIÓN:

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344