Escorriendo’l fraude

Esta entrada está disponible en: Castellano (Castellanu)

El xueves, 3 de marzu, axuntóse una Mesa Técnica na que participemos los sindicatos con representación na Mesa Sectorial d’Educación, la Conseyería d’Educación y Función Pública.  El so envís yera defender les reclamaciones presentaes polos centros referíes a la plantiya orgánica previstes pola Conseyería pal próximu cursu.

Pa SUATEA, amás, tanto esta mesa técnica como la posterior Mesa de negociación que se celebró esti llunes tienen un significáu trescendental, pues planteguemos a l’Alministración dos entrugues coles qu’esclariar les irregularidaes que se vienen cometiendo añu tres d’añu con una propuesta de plantiya que, amás de deficitaria ye virtual, o lo que ye lo mesmo: nun respuende a les necesidaes reales del nuesu sistema educativu, nin ye acorde cola so definición llegal, que diz: “ (la plantiya) ta constituyida polos puestos de trabayu de los cuerpos docentes que, dotaos presupuestariamente, adscríbense a cada centru públicu y son necesarios pal desenvolvimientu de la programación xeneral de la enseñanza, acordies coles sos correspondientes unidaes”.  

Les entrugues y les sos respuestes fueron les que siguen:

  • ¿Cuántos puestos de la plantiya orgánica tán ocupaos por personal funcionario de carrera de los cuerpos docentes non universitarios anguaño? Respuesta: 7.817
  • ¿Cuántos puestos de la plantiya orgánica tán siendo ocupaos por personal temporal interín?  Respuesta: 1.411

Con estes cifres podemos constatar lo que dende SUATEA venimos denunciando nos nuesos comunicaos y movilizaciones dende va tiempu: l‘abusu na contratación de personal interino pa cubrir puestos de naturaleza estructural de la plantiya orgánica, que desempeñen funciones propies de profesoráu de carrera y que nun se pueden xustificar por razones de necesidá y urxencia. Esta irregularidá constitúi’l fraude pol que SUATEA, en solitario o con organizaciones sindicales minoritaries, esixe l’afitamientu del profesoráu interino. Ye una cuestión de xusticia:  como reconocencia al trabayu desempeñáu mientres  años pol profesoráu interíino, que tien, o tendría de tener, derechos adquiríos y, tamién, como  pagu al abusu cometíu pola escesiva temporalidá na so contratación. Acusósenos, tanto dende l’Alministración como dende otres fuerces sindicales, de presentar alternatives irreales, inclusive inconstitucionales, como’l concursu de méritos, que s’asitiaben fora de la llegalidá, asegurando que la única salida pa la estabilización yera sometese a un procesu d’oposiciones de llibre concurrencia. La llucha dionos la razón y güei atopamos con un marcu xurídicu que fai posiblel’l concursu de méritos que les otres organizaciones sindicales consideraben invidable.

La Llei 20/2021, de 28 d’avientu de midíes urxentes pal amenorgamientu de la temporalidá nel sector públicu obliga a finar con a una forma d’actuar tan consolidada como fraudulenta, por eso resulta urxente acabar con esa plantiya orgánica virtual, y les  razones fundamentales son:

  • Determinar el númberu de places (bayuroses, como veníemos denunciando dende SUATEA y qu’agora se pueden deducir de les respuestes daes a les nueses entrugues) coles que desquitar al personal interino de los abusos cometíos na so contratación temporal, por aciu los procesos d’estabilización contemplaos pola actual Llei 20/2021, o bien polo que determinen los tribunales.
  • Cuntar con plantiyes estables y abondoses coles qu’ufiertar una educación de calidá y poder encarar los retos educativos vinientes.

Al respective de la propuesta de les plantiyes orgániques pal cursu 2022/23, la Conseyería d’Educación informó que recibiere 144 alegaciones de los centros educativos. Delles aceptáronles, namá 20 na so totalidá y 25 parcialmente. Tres la mesa técnica celebrada’l xueves aceptáronse 11 reclamaciones más. Estes cifres amuesen cómo la Conseyería d’Educación desoi les necesidaes reales que reclamen les direcciones de los centros utilizando, casi puramente, argumentos basaos na restricción del gastu que, amás, nun s’apliquen por igual a tolos centros, y que poco tienen que ver cola calidá educativa a la que tien derechu l’alumnáu: docencies compartíes, desdobles o otru tipu de sofitos.

A última hora, na Mesa Sectorial, dende SUATEA refuguemos l’actual propuesta de plantiya orgánica:

  • Porque ye insuficiente y nun atiende a les necesidaes reales.
  • Porque nun cumple colos principios reguladores de lo que tien de ser una plantiya orgánica, al contabilizar nella un númberu enforma grande de places que tán siendo ocupaes por personal interino.
  • Porque nun va dexar l’amenorgamientu de la xornada llectiva máxima a 23 hores nel Cuerpu de Maestros  como encamienta la llei.
  • Porque nun va dexar l’amenorgamientu en 2 hores selmanales de la xornada llectiva pal profesoráu mayor de 55 años.
  • Porque nun inclúi puestos de Llingua Asturiana y Gallego-Asturianu, y ello magar rescamplar la estructuralidad d’estes places.
  • Porque caltien la delda pendiente cola inclusión educativa al nun cuntar con puestos abondos p’atendela.

N’ Uviéu a 7 de marzu de 2022

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757