Entamu > Comunicaos > Escluyíos de la oposición + Alcuerdu d’interinidá = PARU

Escluyíos de la oposición + Alcuerdu d’interinidá = PARU

Escluyíos de la oposición y Alcuerdu d’interinidá: la combinación que dexa a docentes na cai

Empezaron les oposiciones y échense cuentes de les tases de participación de les persones que taben llamaes al procesu. Nun se van contabilizar ende aquellos que fueron declaraos escluyíos por erros puramente alministrativos que nun-yos dexaron iguar. Dalgún apaeció como almitíu na llista provisional, otros recurrieron en tiempu y forma pero ensin ésitu, en tolos casos la resultancia ye la mesma: n’Asturies, nun presentase a la oposición supón quedar fora de les llistes d’interinidá y nel casu de tar trabayando nestos momentos, quedase en paru hasta que l’Alministración tenga a bien volver convocar oposiciones de la mesma especialidá (dos años nel meyor de los casos).

Los plazos de publicación del personal escluyíu aforfugáronse al máximu, dos díes antes del empiezu de la prueba apaecíen “correcciones d’erros” que nun yeren más que l’aumentu de damnificados por una Conseyería que nun da signos de tener más considerancia que la de cuadrar los númberos ensin cavilgar sobre les persones qu’hai detrás d’ellos.

Estos plazos nos que mos  movemos nun dexaron la solicitú de midíes cautelares que torgaren la esistencia d’inxusticies con consecuencies clares:  por causa del Alcuerdu d’interinidá van quedar espulsaos de les llistes ensin opción al puestu de trabayu qu’en dellos casos taba desempeñándose.

¿Qué delitu cometieron estes persones? Pos bien cenciellu, presentase pola vez de discapacidá (vez 2) y confundise al pagar les tases pol grupu A2 en llugar de pol A1. Nun-yos valió  de nada iguar nel plazu correspondiente’l so erru, NUN S’ALMITE nesta Alministración rectificar a tiempu. Hai una clausa inaudita na convocatoria que torga a los aspirantes faer esta corrección, clausa que nun ta determinada pola  lexislación cimera, sinón que ye una amuesa más del estilu” de la Conseyería d’Educación siempres inflexible ya intolerante. La falta d’empatía y sensibilidá y el despreciu poles situaciones dacuando dramátiques de los/les  sos trabayadores, amuesen el talante antidemocráticu resalvando la obligación de l’Alministración de velar por facilitar a los alministraos los procedimientos nos que participen.

Lo más llamentable y desolador ye qu’estes situaciones nun van acabar equí, vienen sufriéndose n’oposiciones anteriores y van siguise produciendo mientres nun haya un nuevu Alcuerdu d’Interinidá que modifique les condiciones de permanencia nes llistes.

Dende SUATEA queremos denunciar toos estos fechos y amosar una vegada más la urxencia d’abrir una nueva negociación que modifique la situación del profesoráu interín.

 

Esta entrada tamién se puede consultar en: Castellanu