Home > Aición sindical > Énte les acusaciones integristes namás val la defensa de los valores democráticos

Énte les acusaciones integristes namás val la defensa de los valores democráticos

La derecha integrista carga contra los planes educativos que trabayen pola igualdá. La so campaña lleva a delles docentes a declarar énte los Xulgaos de Pamplona/Iruña esti vienres. Dende va dos años, vien funcionando en Navarra’l Programa Skolae qu’atiende la educación del alumnáu de la Comunidá Foral nel ámbitu de la igualdá, aplicada ésta a cuestiones culturales, relixoses, identitaries, d’orientación sexual y de xéneru.  Trátase d’un Programa oficial del Gobiernu navarru que s’aplica, obligatoriamente, en tolos centros, tanto públicos como concertaos.

Otra vez, los prexuicios y los intereses xeneraos polos sectores integristes, de claru raigañu franquista, punxeron en marcha una campaña difamatoria que tien como oxetivu la eliminación del plan y, poro, evitar cualquier meyora rellacionada cola coeducación y l’igualdá. Asina, espublizaron comentarios denigrantes qu’afecten a les persones responsables del Programa xunto con amenaces ya insultos personales. Amás d’esto, presentaron denuncia nos Xulgaos asociaciones de marcáu carís ideolóxicu ultraderechista ya integrista asina como dalgún grupu de families de colexos concertaos. Ente les persones denunciaes, atópense les responsables del Programa Skolae, del que forma parte la profesora asturiana Marian Moreno Llaneza, esperta en coeducación y referente a escala estatal, que vieno trabayando nel  procesu de redacción del mesmu.

Nun momentu nel qu’ante la gravedá de los crímenes de violencia de xéneru lleven a munchos espertos a solicitar que s’incluyan midíes y planes concretos pa educar al conxuntu de la población, estos sectores ultres movilícense pa frenar cualquier meyora nesti sentíu y desmantelar los programes oficiales ellí onde tean vixentes.

Dende SUATEA siempres señalemos la importancia de la coeducación como ferramienta que dexe al alumnáu actuar crítica y llibremente nestes cuestiones tan importantes pal so propiu futuru. Creemos que nuna sociedá democrática, trabayar y educar n’igualdá nun debería de ser oxetu de nengún cuestionamientu. Esmoleznos que los que se dediquen a espublizar ente l’alumnáu los valores de la igualdá y el respetu a la diversidá seyan víctimes d’un acosu que s’enconta namás en prexuicios ideolóxicos que nos devuelven al pasáu del nacional-catolicismu. Nun puede haber equidistancia a la hora de xulgar estos fechos. La llibertá, la democracia, la igualdá nun pueden cuestionase so l’acusación d’adoctrinamientu. Al contrario, adoctrinen los que, dende los sos convencimientos relixosos y prexuicios personales, intenten imponelos al conxuntu de la sociedá.

Uviéu, 12 de xunu 2019

Igualmente, dende la Confederación Intersindical sofitamos el Plan SKOLAE d’Educación n’Igualdá y Educación Afectivo-Sexual de Navarra al traviés d’ ESTI comunicáu y propónse una recoyída  firmes contra les denuncies a persones redactores y tutores del PLAN DE COEDUCACIÓN SKOLAE — Firma en avaaz.org  —

 

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339