Home > Comunicaos > Énte la crisis del coronavirus

Énte la crisis del coronavirus

La situación actual que tamos viviendo de resultes de la crisis sanitaria y económica provocada pol COVID-19 ta dexándonos comprobar que la salú de les persones ta en manes d’un sistema sanitariu que, depués d’años de
privatizaciones y recortes, pola mor de les polítiques económiques neolliberales aplicaes polos gobiernos del Partíu Popular y el Partíu Socialista, ta sobrepasáu claramente pola situación.

Güei los y les trabayadores realicen el so llabor nos centros de salú y hospitales en primera fila a pesar de que nun-yos apurren el material afayadizo, nin pa la so propia protección nin pa que puean desenvolver l’actividá profesional coles meyores garantíes tanto pa les persones afectaes como pa les que trabayen nel sector sanitariu y les sos families. Con esti incumplimientu sistemáticu de la Llei de Prevención de Riesgos Llaborales, el númberu de contaxos y inclusive de fallecimientos ente’l personal hospitalario aumenta caldía, obligando a los demás compañeros y compañeres a realizar xornaes llaborales frayadores pa poder caltener el serviciu. Dende equí’l nuestru agradecimientu a toes y toos pol so esfuerciu pa curiar de la nuestra salú a pesar de les dificultaes a les que s’esponen.


La crisis sanitaria ta provocando una crisis económica nueva que quieren que vuelva cayer enriba de la clas trabayadora. Tamos viendo caldía cómo les midíes que se tán llevando a cabu en nengún momentu tán protexendo los intereses de los y les trabayadores, sinón que tán protexendo los del sistema capitalista, anteponiéndolos a la nuestra salú. Tovía güei hai sectores que siguen ensin paralizase cola sida de que son sectores esenciales, unviando milenta persones a esponese al riesgu de garrar la enfermedá y nun paralizar la cadena de contaxos.


Esta situación hai que la contestualizar nel marcu asturianu, un territoriu yá de por sí castigáu pol desempléu y la precariedá, onde miles de persones yá nun teníen, enantes d’esta crisis sanitaria, derechu a determinaes prestaciones. Tenemos mieu a qu’énte los miles de despidos que se tán produciendo estos díes, los espedientes de regulación, les mengües de xornada, etc., la situación pueda agravase hasta puntos estremos. A esto hai que sumar la esistencia d’una economía sumida qu’afecta sobre manera a los sectores fuertemente feminizaos, en riesgu de quedar dafechu desamparaos. De la que vaigan pasando los díes de confinamientu, van dir saliendo a la lluz situaciones d’auténtica desesperación, onde’l famosu #quedaencasa va convertise en daqué inasumible.


Por esti motivu, esiximos al Gobiernu asturianu que protexa a toles persones y families que nun cunten con dengún tipu d’ingresu, nin vaigan consiguilu al tar l’actividá económica baxo mínimos, polo que van tener difícil algamar los recursos básicos que-yos dexen cubrir les necesidaes pa una vida digna. Esta propuesta que llanzamos podría concretase cola instauración d’una Renta Básica pa toles persones, incluyíos aquellos sectores socialmente escluyíos o con derechos llendaos, como ye’l casu de la población procedente de la inmigración.


Dende equí, queremos facer un llamamientu a tola clas obrera y demás sectores populares asturianos pa que tea sollerte, de manera que, namás qu’esti confinamientu acabe, teamos en condiciones de salir a la cai a defender una salida social d’esta crisis nueva frente a les presiones de los poderes económicos y a los intereses del capital. Sollerte pa defender unos servicios públicos de calidá y pa esixir la vuelta a lo público de tolos sectores privatizaos. Sollerte frente a la xubida de la estrema derecha, que va querer beneficiase del mieu y de la inseguranza. Sollerte p’aneciar non solo en qu’otru sistema ye posible, sinón qu’otru sistema ye necesariu, y son
les clases trabayadores les que tienen que lu construyir.

SUATEA – CNT ASTURIAS – CGT – CSI

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344