Home > Comunicaos > Enseñanza pública masificada y ensin profesoráu

Enseñanza pública masificada y ensin profesoráu

ENSEÑANZA PÚBLICA MASIFICADA Y ENSIN PROFESORÁU

Nos últimos tiempos, les noticies nel campu de la educación centráronse nel retayu d’unidaes, especialmente na etapa d’Educación Infantil. Esta realidá, que quier xustificase pol descensu demográficu n’Asturies, nun puede resalvar qu’esisten centros na rede pública que nun protagonizaron nenguna amenorga na matrícula y, sicasí, la Conseyería sigue castigándolos cursu tres cursu al nega-yos la plantiya de profesoráu necesario pa la fayadiza atención del alumnáu del centru. El casu más sangrante ye’l del CP Montevil de Xixón, onde se niega dende hai dellos cursos el profesoráu de sofitu necesario pal alumnáu d’Educación Infantil. Esti cursu, los padres, madres y el profesoráu d’esti colexu, fartos yá de la inoperancia de la Conseyería, tán protagonizando movilizaciones pa esixir que-yos unvien el profesoráu que fai falta nel centru.

Dende SUATEA, queremos denunciar, una vegada más, les sides del Conseyeru d’Educación al respective de la so defensa de la enseñanza pública. Rescampla que les sos declaraciones nun obedecen más qu’al “posturéu” y a lo políticamente correcto pa salir del pasu, ensin entrar no fondero de la cuestión que tien de ser el verdaderu compromisu por defender una enseñanza pública y de calidá.

SUATEA esixe que se dote al CP Montevil del profesoráu necesariu pa exercer un llabor docente que se correspuende con una enseñanza pública de calidá.

Reivindicamos tamién que dende la Conseyería d’Educación cumplan los compromisos de plantiyes que son los que dexen garantizar el fayadizu llabor del profesoráu nos centros educativos.

Reivindicamos que se cumplan les ratios d’alumnáu per aula, esaniciando los escesos de ratios que contribúin a masificar los centros y a estropiar la calidá educativa.

Aguiyamos a la Conseyería d’Educación y los sos responsables a realizar una verdadera política de defensa de la enseñanza pública y de calidá, siendo coherentes coles sos intervenciones nos medios de comunicación y nel Parlamentu Asturianu, asina como col cumplimientu de la llei que tanto dicen defender.

Uviéu, 18 d’abril de 2017

El Secretariáu de SUATEA

Esta entrada tamién se puede consultar en: Castellanu