Home > Comunicaos > Encierru en defensa del profesoráu interino nel MECD

Encierru en defensa del profesoráu interino nel MECD

ENCIERRU EN DEFENSA DEL PROFESORÁU INTERINO NEL MINISTERIU EDUCACIÓN.

La xunta celebrada güei na see del Ministeriu d’Educación, Cultura y Deporte remató ensin nengún alcuerdu. El Ministeriu pretende cerrar unillateralmente la negociación desoyendo’l pidimientu de Sindicatos, Comunidaes Autónomes y la mayoría del Congresu los Diputaos.

El Ministeriu, una vegada más, nun fizo casu al pidimientu mayoritariu de los sindicatos representaos na Mesa y decidió dar por concluyida la negociación ensin aceptar la esixencia de que les pruebes a desenvolver nel procesu d’Oposiciones que se va convocar pa 2018 y siguientes, nun sían eliminatories. Hai que recordar qu’ésta yera una postura de mínimos, en negándose dafechu’l MECD a axustar un accesu estremáu pal personal interino que lleva trabayando años na enseñanza, como defenden SUATEA y la Confederación de STES-Intersindical y, en segundu términu, l’aplicación d’un sistema transitoriu asemeyáu al que tuvo en vigor nos procesos selectivos dende 2007 hasta 2011. Dambes propuestes fueron refugaes dafechu pol MECD.

Na xunta de güei, la tercera propuesta (que les pruebes nun tengan calter eliminatoriu), tres un procesu que’l MECD allargó cola sida de consultar a l’Abogacía del Estáu, tamién quedó refugada pola Alministración.

Ello nun fai sinón confirmar el calter autoritariu del Ministeriu, que se ta portando igual que na etapa na que Wert era’l so titular. La imposición en contra del criteriu de los representantes del profesoráu, de les Comunidaes Autónomes non gobernaes pol Partíu Popular y del Congresu de los Diputaos qu’aprobó una Proposición Non de Llei nel mesmu sentíu, demuestra’l nulu talante negociador d’un Departamentu que fixo de la Educación un campu onde desenvolver les sos polítiques más retrógrades, antidemocrátiques y agresives, que pueden suponer el despidu de miles de docentes interinos.

Asina, la representación de STEs, de la que forma parte Isabel González, del secretariáu de SUATEA, xunto con representantes d’otres fuerces sindicales, tán nestos momentos zarraos na see Ministerial y ellí van siguir hasta que venga un responsable políticu del Ministeriu que tea por desbloquiar la negociación.

Faemos un llamamientu dende la nuesa organización sindical al profesoráu interino, pa qu’intensifique nes próximes feches les movilizaciones y multiplique les concentraciones y manifestaciones yá convocaes pa los próximos díes.

A lo último, queremos tamién faer un llamamientu a los sindicatos firmantes del Alcuerdu del 29 de marzu, pa que denuncien el so incumplimientu énte la postura que ta teniendo’l MECD y nel casu, de que’l Ministeriu atestone na so posición, formalicen la so salida del Alcuerdu.

Secretariáu de SUATEA-STEs-Intersindical,
30 de payares de 2017

 

Esta entrada tamién se puede consultar en: Castellanu