Home > Comunicaos > El virus que-y aforra perres a la Conseyería.

El virus que-y aforra perres a la Conseyería.

EL VIRUS QUE-Y SIRVE A LA CONSEYERÍA P’AFORRAR DINERU

Cuando dende’l Gobiernu central aportunen de cutio en que naide nun va quedar p’atrás de resultes de la crisis del coronavirus, atopamosmos con un escenariu peculiar n’Asturies.

Paez qu’esta pandemia mundial ye útil pa les arques de la Conseyería d’Educación d’Asturies, porque-y supón un aforru cada día que pasa. Aforren en sueldos de profesoráu interín que nun ta siendo llamáo desque se fixo la última convocatoria del 10 de marzu (convocatoria atayada, pos nun pudieron tomar posesión). Mentanto, los equipos directivos de dellos centros esixen que’l profesoráu asuma al alumnáu del profesoráu que ta de baxa o se xubiló. Esto significa que s’obliga al profesoráu a asumir, non solamente una sobrecarga brutal de trabayu p’atender al so alumnáu nesti contestu estraordinariu, sinón una doble porque tien d’atender al alumnáu que nun ta atendíu pola Conseyería al nun nomar sustituciones.

Curiosamente, dende SUATEA, sondiemos a dellos centros y nuna rápida pasada, atopemos qu’hai profesoráu de baxa y xubilaciones en dellos centros, ye dicir que sí qu’habría profesoráu que nun ta siendo sustituyíu y qu’hai alumnáu qu’o nun ta siendo atendío por falta de personal o ta siendo asumío pol profesoráu del centro ante l’ausencia de sustitución.  Esta ye la idea de la Conseyería sobre’l “Nun va quedar naide tras”: dexar ensin trabayu a profesoráu interino xusto nel momentu que más falta faen pa garantizar el funcionamientu docente en mediu d’esta situación estraordinaria. La Conseyería dexa atrás al profesoráu interín que nun contrata, al profesoráu qu’asume l’alumnáu de les persones de baxa o permisos y al alumnáu que s’atopa con que l’atención que reciben ye d’un profesoráu sobrecargao de trabayu.

A esto hai qu’añedir que se van aforrar tamién el pagu del branu a muncho d’esti personal, porque, vistos los datos que tenemos, nun se cumplen los díes mínimos de trabayu si nesti tiempu se negaron a facer nomamientos. Por eso, esiximos, amás de que se reinicien los llamamientos pa cubrir les baxes de profesoráu, que se tenga en cuenta, a efectos de prórroga de branu, los meses en que nun hubo llamamientos de personal interino.

Falar de situación esceicional” ta sirviendo pa desregularizar toles condiciones llaborales del conxuntu del profesoráu, ye la escusa perfecta pa facer y desfacer ensin tener en cuenta los derechos llaborales de tou un colectivu que, amás, nin siquier recibe una merecida reconocencia pola so capacidá p’afaese ante la crisis. En cuenta de ello siente cómo s’amonten les presiones, estrés y ataques con responsabilidaes que faen que les xornaes llaborales recuerden a les condiciones del sieglu XIX. Y, mientres, la Conseyería sigue faciendo caxa, sigui aforrando y evitando responder a los requerimientos de SUATEA.

Dexar pasar los díes, nun contestar a los sindicatos, facer el paripé d’apuntar les reivindicaciones pa dempués nun les responder, asina van aforrando día ente día, selmana a selmana en personal. La esistencia de xuntes de calter informativu nun puede ser el marcu permanente d’alcuentru ente Alministración y sindicatos y, nesti contestu estraordinaria en que se vienen desregularizando les condiciones llaborales, ye menester convocar mesa sectorial de negociación. Nun puede pretendese informar ensin posibilidá de pidir aclaraciones nin rectificación per parte de la Conseyería énte decisiones que consideramos incorreutes o que, cumpliendo col so cometíu, dean en solucionar arbitrariedaes que pueden tase cometiendo en dellos centros a la de diseñar los planes de centru hasta xunu.

Llamónos l’atención que na rueda de prensa que dio la Conseyera, nes noticies que lleemos casi a diariu na prensa, nun hai una sola referencia al trabayu que ta faciendo’l profesoráu nesti cambéu absolutu de paradigma educativu, amosando una absoluta insensibilidá, como si’l profesoráu fuera inmune a los efectos del confinamientu y de la crisis sanitaria mundial.

Asina, non. Tenemos que dicir altoy claro qu’esa nun ye la manera de tratar al profesoráu nin a los sos derechos llaborales, una situación como ésta nun tien de sirvir d’escusa pa desregularizar les condiciones llaborales d’un colectivu qu’intenta ayudar al so alumnáu en tolo que puede, nunes condiciones adverses terribles. La educación pública, como siempres, sía en circunstancies esceicionales o non, sigui recibiendo ataques de les mesmes autoridaes educatives.

Na xunta celebrada güei ente la Conseyería d’Educación y les organizaciones sindicales, SUATEA plantegó nun participar en más xuntes informatives si nun se convoca darréu una Mesa Sectorial d’Educación na que tratar:

  • La contratación del profesoráu necesario hasta final de cursu.
  • Tomar midíes efectives que torguen la desregulación de les condiciones llaborales del profesoráu por cuenta de la pandemia

N’Uviéu a 24 d’abril de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344