El Senáu aprobará Llei de Formación Profesional próximamente

Esta entrada está disponible en: Castellano (Castellanu)

La Confederación de STEs-i (de la que forma parti SUATEA) valora negativamente lo que supón un pasu alantre na mercantilización de la educación y la situación na que queda’l profesoráu d’estes enseñances tres l’aprobación de la llei.

El próximu miércoles 23 de marzu, el plenu del Senáu va aldericar y va votar el proyectu de Llei Orgánica d’ordenación ya integración de la Formación Profesional, que probablemente quede definitivamente aprobada. Anque nun pueden refugase situaciones como la que se dio cola llei de Presupuestos Xenerales del Estáu n’avientu pasáu, na qu’una mayoría “antinatura” (el Partíu Popular sofitó una enmienda d’ERC) llogró modificar el testu unviáu dende’l Congresu pa que’l proyectu de llei nun fora aprobáu nesi momentu y hubiera de volver pal so alderique definitivu al Congresu de los Diputaos. Los alcuerdos políticos faen prever que’l testu qu’apruebe’l Senáu va ser el mesmu que l’unviáu pol Congresu, colo que la llei de FP taría nel BOE esti mesmu mes de marzu.

Esta llei nun va tener el consensu que dende’l Gobiernu pretende faese creer. Nin políticu (na Comisión del Senáu, l’informe de la ponencia esti pasáu martes, día 16, aprobóse con 15 votos a favor, 10 en contra -PP y Vox- y 3 abstención -ERC y UPN-, nin sindical (anque CCOO y UXT xunto cola patronal CEOE sofiten esta llei… y la repartida de les sustancioses cantidaes de dineru que trai). Hai un númberu importante d’organizaciones sindicales qu’amosaron la so rocea énte esta llei y, en concencia, SUATEA y los STEs oponémonos firmemente a ella.

Anque, como yá asocedió cola LOMLOE, el trámite parllamentariu introdució dellos cambeos qu’ameyoren notablemente l’anteproyectu de llei qu’aprobó’l Conseyu de Ministros el 15 de xunu de 2.021, hai aspeutos sustanciales que dende la nuesa Confederación paécennos inasumibles:

Les empreses ganen terrén, la educación pierde. La nueva llei de FP establez que tola formación profesional pasa a ser dual. Amás de lo cuestionable que ye que s’adopte’l modelu d’un país como Alemaña, con gran texíu industrial, wl nuesu que nun destaca especialmente por tener grandes empreses, sinón una rede de medianes y pequenes, el fechu ye que parte de la formación que se desenvuelve anguaño nos nuesos centros educativos va tresferise a les empreses. Dende quien entendemos la educación como’l desenvolvimientu integral de la persona en tolos sos aspeutos y non como la formación de mano d’obra pa atender les necesidaes empresariales o económiques, creemos que la formación qu’ufierta la escuela nun la puede sustituyir la empresa. Más allá de les habilidaes técniques que puedan adquirise en fábriques y talleres, el bagaxe cultural, humanu, social, emocional… pertenecen al ámbitu de tresmisión educativu.

Amás, esi tresvase de los centros educativos a les empreses va traer otra consecuencia: al dase menos formación nos centros, va faer falta menos profesoráu. Magar la medría de la demanda de les enseñances de Formación Profesional d’estos últimos años, ye posible que parte del profesoráu actual, pierda’l so puestu de trabayu.

  • La situación del profesoráu de FP nun ameyora cola llei, al aviesu va complicar la coordinación docente y el trabayu n’equipu. Cuando entre en vigor la llei, vamos tener una situación complexa nos nuesos Colexos ya Institutos tocántenes al profesoráu qu’imparte esti tipu d’enseñances. Pueden pertenecer a trés cuerpos distintos d’enseñanza: Cuerpu de profesores de Secundaria, Cuerpu de profesoráu Técnicu de FP a escastar, el nuevu Cuerpu qu’introduz esta llei, el Cuerpu de profesoráu d’especialidaes singulares y, amás, l’alministración puede contratar a profesores “especialistes” en determinaes condiciones. La situación más alloñada posible a la reivindicación histórica de los STEs, del cuerpu únicu d’enseñanza, que tamién defenden -agora- otres organizaciones sindicales.

DEMANDES DE LA CONFEDERACIÓN DE STEs-i TOCANTE AL PROFESORÁU DE FORMACIÓN PROFESIONAL

La LOMLOE, en vigor dende xineru de 2.021, establez na so disposición adicional undécima que s’integren nel cuerpu de profesores d’enseñanza secundaria les especialidaes de formación profesional incluyíes nel cuerpu a escastar de profesores técnicos de Formación Profesional…” Catorce meses dempués, el Ministeriu non solo nun fixo efectiva esta disposición, sinón que nin siquier empecipió’l procesu pa desenvolvela. Pretendemos que’l profesoráu de FP tenga les mesmes condiciones que los sos compañeros del Cuerpu de Secundaria, colos que comparte centru de trabayu y alumnáu. Pa ello plantegamos:

La esixencia de la integración inmediata nel Cuerpu de Secundaria de tol profesoráu de FP cola titulación necesaria. Esa integración tien de faese de manera automática y con efectu retroactivu de xineru de 2021.

Pidimientu de que s’abra la negociación pa determinar les titulaciones equivalentes a efectos de docencia que dexen aportar al subgrupu A1 al restu de PTFP que nel so momentu aportaron a dichu cuerpu con una titulación distinta a la que se contempla na Disposición Adicional Undécima de la LOMLOE. Consideramos que l’apertura de negociaciones pa la ellaboración del Estatutu Docente tien de ser el momentu fayadizu d’encetar esta reivindicación.

ACTUACIONES INMEDIATES

La Confederación de STEs-i convocó una concentración frente al Senáu, el próximu martes 22 de marzu -día previu de la votación nesa Cámara lexislativa- pa reivindicar una llei de FP más xusta y progresista:

• Que nun discrimine al so profesoráu: a igual trabayu, igual salariu, iguales condiciones llaborales y profesionales.
• Que respete les lleis yá aprobaes ensin más dilación: desenvolvimientu inmediatu la disposición adicional undécima de la LOMLOE pa que quien cumple los requisitos establecíos na mesma apuerten al subgrupu A1, ensin más esixencia y con calter retroactivu a la entrada en vigor de la LOMLOE.
• Que respete la negociación sindical: negociación inmediata por que’l restu del Profesoráu Técnicu de FP apuerte al referíu subgrupu A1 de forma inminente.
• Que nun dexe atrás al so alumnáu: la formación integral, polivalente y gratuita solo va tar asegurada si se desenvuelve al traviés de los centros de FP, non d’empreses que la so principal motivación ye l’ánimu d’arriquecimientu y a les que nun-yos convién formar bonos profesionales que se conviertan nos sos futuros competidores.

Amás, convocaes tamién por organizaciones profesionales: concentraciones del PTFP en tolos centros de FP a la hora del recréu.

Los secretariaos de SUATEA y STEs Intersindical
Uviéu 17 de marzu de 2022

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757