El refugu a la convocatoria d’oposiciones espárdese pel Estáu

Sindicatos de Canaries, Murcia y País Valencianu coinciden con SUATEA na so propuesta p’aplazar les oposiciones docentes 2021 hasta que la situación sanitaria dexe la so celebración en condiciones sanitaries y llaborales normales

Los sindicatos STEPV (País Valencianu), STERM-i (Murcia) y STEC- IC (Canaries) xunto con SUATEA, confirmaron  el so refugu a la convocatoria de les oposiciones 2021 plantegando diverses midíes de presión y movilizaciones. Hai que señalar que nel casu del País Valencianu, onde les oposiciones celebraránse’l próximu mes de mayu, el STEPV –sindicatu llargamente mayoritariu nesi territoriu- yá empecipió una importante campaña de movilizaciones dende va meses, incluyendo la convocatoria d’una xornada de fuelga mientres el mes d’avientu, al igual que la celebrada en Canaries el pasáu 15 de marzu. Pue señalase que la posible celebración de les oposiciones en Valencia, en distinta fecha a la prevista na mayoría los territorios, va facilitar el qu’aspirantes d’esi territoriu van poder allegar ensin torga dalguna a les oposiciones n’otros territorios del Estáu.

Como ye sabío, les distintes comunidaes autónomes  del Estáu tán somorguiaes nel desenvolvimientu de los procesos selectivos 2021 nel ámbitu docente faciendo pasar por normal lo que nun lo ye. Si daqué caracteriza al momentu actual, ye la imprevisibilidá de determinaes situaciones que puedan  xenerase nos próximos meses por cuenta de la evolución de la pandemia.

Esti cursu presentóse con munches torgues dende’l so entamu, dotando d’una sobrecarga de trabayu al profesoráu que, vista la situación sanitaria actual, nun paez que vaya a menguar d’equí a poco. Dende les organizaciones señalaes considérase que la prioridá del personal docente ta siendo realizar el so llabor cola máxima profesionalidá pa rematar el cursu ensin que l’alumnáu se vea perxudicáu nun escenariu tan complicáu. Too ello en mediu l’estrés y ansiedá que supón la medrana a les andaes, cuidao que’l llabor docente implica’l contactu cercanu con un eleváu volume d’alumnáu ensin, en munchos casos, cuntar coles midíes de protección necesaries. A esti respectu convien recordar que’l profesoráu foi’l tercer colectivu profesional con más seropositividá (11%) por COVID-19 tres el personal sanitario y socio-sanitario mientres la tercer folada de la pandemia. Caltener los centros abiertos tien estos costos.

La medría del volume de trabayu polos protocolos adoptaos y l’estrés que causa’l mieu a les andaes enzanquen la xera. Nel casu del profesoráu interíno, esta ansiedá aumenta énte l’amenaza de convocatoria d’unos procesos selectivos nos que se xueguen les sos mires y los sos puestos de trabayu. Esto déxanos afirmar, ensin dulda, que con estes oposiciones les alministraciones tán penalizando al profesoráu que ta sacando  esti cursu tan difícil , yá que nun se dan les condiciones llaborales, nin anímiques, necesaries pa preparar les oposiciones. ¿Podemos imaxinar al personal sanitario teniendo que pasar por una oposición de la que va poder depender la so estabilidá llaboral nestos momentos? Pues esi mesmu disparate ta dándose na escuela pública: quien ta al pie del cañón llogra como compensa inseguridá, estrés y precariedá llaboral.

Igualmente, paeznos esmolecedor que, dafechu na pandemia, tean convocándose procesos selectivos masivos en base a intereses partidistes afectaos pola sentencia del Tribunal de Xusticia de la Unión Europea (TXUE), que plantega la necesidá de sancionar les contrataciones en fraude de llei. Esto val pa Educación, Sanidá y otros sectores públicos y asocede nunos momentos nos que’l personal s’atópa devasáu pol trabayu y l’estrés que xenera esta situación de pandemia.

Les rápides y fuertes oscilaciones nes andaes y les dificultaes pa desenvolver el procesu de vacunación nun garanticen que la convocatoria d’oposiciones pueda llegar a efectuase en condiciones de seguridá sanitaria. Nun se sabe cuál va ser l’escenariu sanitariu pal próximu branu. Forzar la so celebración puede ser una temeridá.  Caltener estos procesos selectivos, col riesgu de que finalmente puedan llegar a suspendese por un escenariu negativu, supondría que tol tiempu y esfuerzu emplegáu na so preparación, quedaríen pa prau.

Por too esto, dende’l STEC-IC, STEPV, STERM-i y SUATEA consideramos imprescindible que les distintes alministraciones anuncien, de forma coordinada y cuanto antes, l’aplazamientu de les oposiciones del 2021 hasta que les condiciones sanitaries dexen la so preparación y realización coles máximes garantíes d’igualdá d’oportunidaes y seguridá sanitaria pal conxuntu d’aspirantes.

Solliniamos que tamos trabayando n’andecha  pa consiguir la estensión del refugu a la celebración de les oposiciones docentes en plena pandemia a otros  territorios del Estado Español.

Per otru llau, entendemos que les alministraciones nun pueden resalvar la situación en fraude de llei na que s’atopa xuna parte bien importante del colectivu interín, ratificaes por sentencies europees, especialmente la del 19 de marzu de 2020, na qu’amás s’indica que les oposiciones nun son la fórmula para solucionar el problema. Por ello, simultáneamente al aplazamientu proponemos la busca urxente d’una fórmula que reconoza la fixeza nos puestos de trabayu al personal interino en situación d’abusu de temporalidá.

25/03/2021