Home > Comunicaos > El PSOE pide paralizar la LOMCE nel Congresu. ¿Y n’Asturies?

El PSOE pide paralizar la LOMCE nel Congresu. ¿Y n’Asturies?

D’unos díes p’acá tamos asistiendo a una riestra d’iniciatives nes Cortes rellacionaes cola implantación de la LOMCE. Per otru llau, n’Asturies cientos de docentes aconceyaos n’asamblees tán faciendo público que tán malagusto pola forma na que se ta poniendo en marcha esta Llei na nuestra comunidá.

Por ello SUATEA quier dirixise otra vez al Conseyeru d’Educación pa qu’atienda los pidimientos más que razonables del profesoráu. El sofitu vien agora del propiu Grupu Parlamentariu Socialista que’l día 14 tien rexistrao nel Congresu de los diputaos delles Proposiciones de Llei referentes a la suspensión del calendariu d’implantación de la LOMCE.

Depués de refugar “un calendariu d’implantación que se demostró inasumible pa les CCAA y pa los propios centros, poniendo n’evidencia, otra vuelta, que la reforma taba fecha ensin un diagnósticu compartíu, ensin debate previu y dando’l llombu a la comunidá educativa, plantegándose ensin recursos y en medio de retayos brutales que degraden la calidá educativa y atenten contra la so equidá.”, el Grupu Parlamentariu Socialista califica a la Llei como ”contrarreforma segregadora ya intervencionista qu’ataca directamente a la igualdá d’oportunidaes y retrocede na equidá y la calidá de la educación.”

Por ello propónse la paralización del calendariu d’aplicación de la LOMCE “y darréu la suspensión de la entrada en vigor de les normes dictaes pa desenvolvelu que nun tengan tovía vixencia o aplicación efectiva,”.

Esto ye precisamente lo que pide’l profesoráu de los IES asturianos. Na circular d’entamu de cursu, la propia alministración asturiana daba un plazu de dos años pa perfacer les nueves programaciones docentes onde se van aplicar los nuevos procedimientos d’evaluación, de promoción y los nuevos criterios de calificación aplicables al alumnáu. La comunidá educativa tien que saber que la Conseyería d’Educación d’Asturies, que llamentablemente entainó pa publicar los currículos LOMCE a finales del cursu pasáu, xenerando una situación insólita nos centros, pretende qu’al alumnáu de 1º y 3º d’ESO y el de 1º de Bachillerato se lu evalúe na primer y segunda evaluación siguiendo unos criterios de calificación y na ordinaria de xunu y la estraordinaria de setiembre con otros.

Lo que tán pidiendo los centros ye que s’aplique una moratoria tanto nes evaluaciones d’estos cursos como na ellaboración de les nueves programaciones, cosa que ye  güei más pertinentes que nunca. El grupu parlamentariu del PSOE nel Congresu col so secretariu xeneral a la cabeza tienlo claro.

Esperemos que’l Conseyeru d’Educación d’Asturies asuma les reivindicaciones del PSOE y acceda a los más que razonables pidimientos del profesoráu asturianu.

Uviéu, 21 de xineru de 2015

Esta entrada tamién se puede consultar en: Castellanu