Home > Aición sindical > El profesoráu asturianu escaecíu nos presupuestos pal añu 2015

El profesoráu asturianu escaecíu nos presupuestos pal añu 2015

Chapa Vota2014Asturies ye una de les comunidaes con menos salariu docente

SUATEA denuncia que l’Alministración asturiana ye de les que pior trata al profesoráu nes sos condiciones llaborales y salariales.

La Conseyería d’Educación cuenta cola conxelación salarial pal profesoráu nel cursu que vien. Nin siquiera va abonar completa la paga extra del 2012, sinon que’l profesoráu funcionariu recibirá una cuarta parte de la mesma nel mes de xineru.

L’alcuerdu ente PSOE y PP p’aprebar los presupuestos na nuestra comunidá autónoma, con una rebaxa nos impuestos, xenera alarma na comunidá educativa. Si se rebaxen los ingresos, los que se van ver perxudicaos van ser ente otros los docentes, que van ver empiorar les sos condiciones llaborales. Y ente ellos, los más perxudicaos van ser los docentes interinos, que van sofrir despidos y precariedá.

Estos recortes previsto n’Asturies van agravar les intenciones del gobiernu de Rajoy de menguar el gastu públicu n’educación hasta un 3’9% del PIB nel 2017 (nel 2008 algamóse’l 5’1% y anguaño tamos nun 4’3%). Esta rebaxa nel PIB va facese efectiva con más recortes, un aumentu de les ratios, la disminución de salarios, la xuba na edá de xubilación, el despidu de profesoráu interín, la rebaxa na calidá educativa, tal y como marca’l Proyectu de Decretu d’Especialidaes de Secundaria…

Nesti marcu, la Conseyería d’Educación convoca la mesa sectorial pal llunes que vien, en viéspora de les elecciones sindicales nel enseñu, na que plantega modificar el reglamentu de los Planes d’Evaluación del Profesoráu. Ye una actuación insólita y ensin precedentes.

Esta burda maniobra realízase col envís de dar fuelle a los sindicatos afines al gobiernu, los sindicatos ANPE y FETE-UGT que tán dimpuestos a firmar alcuerdos como’l que torgó la estabilidá del colectivu interín o el qu’acabó cola xuba salarial llinial pa tol profesoráu ensin escepción.

El nuevu máximu responsable estatal del PSOE, Pedro Sánchez, almite y rectifica’l garrafal erru del anterior gobiernu socialista, que modificó l’artículu 135 de la Constitución qu’antepón el pagu del rescate bancariu a Europa frente al gastu públicu n’educación y sanidá.

Sicasí, el gobiernu asturianu anecia nel erru: envede plantegar una xuba salarial pa tol profesoráu, insiste n’apostar por un sistema retributivu qu’esclúi explicitamente y ensin torga posible a más de la cuarta parte del profesoráu asturianu.

SUATEA esixe un cambéu de camín al gobiernu tanto en materia salarial con una xuba llinial ensin discriminación nenguna, como nes condiciones llaborales (reducción horaria pa tol profesoráu, modificación del tratamientu de les baxes llaborales, ampliación de les plantiyes, oposiciones pa estabilizar al colectivu interín, nuevu alcuerdu d’interinos,…) y llamenta profundamente’l tratu que se-y ta dando a los sindicatos proclives a l’alministración.

Uviéu, 28 de payares del 2014

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344