Home > Comunicaos > El profesoráu asturianu énte la tercer fola. Nueves incertidumes

El profesoráu asturianu énte la tercer fola. Nueves incertidumes

El profesoráu asturianu énte la tercer fola. Nueves incertidumes

Cuando s’empecipió’l cursu 2020-21 a finales de septiembre, la medrana y l’ansiedá yeren la tónica dominante ente’l profesoráu asturianu. Más allá del retrasu inicial y del ataque que supunxo la imposición per parte de la Conseyería d’un calendariu escolar qu’anunciaba una saturación de xornaes escolares ensin nengún tipu de descansu, el cursu empecipió con normalidá y l’actividá docente desenvolvióse ufiertando rempuestes positives énte la segunda fola de la pandemia que creció a lo llargo de la seronda.

La rempuesta del profesoráu asturianu tuvo marcada pola profesionalidá, encarando medranes qu’afeutaben al personal vulnerable que se quexaba de les escases garantíes que, pa esos casos, ufiertaba la Conseyería. Produciéronse brotes y contaxos que llevaron a un númberu significativu de confinamientos pero, en términos xenerales, pue dicise que l’actividá escolar presencial salió airosa de la prueba. La Escuela Pública siguió funcionando dientro d’esta Nueva Normalidá en mediu los zarros perimetrales, garantizando asina’l derechu de los nuesos menores a la educación.

Agora, col nuevu añu, tenemos qu’encarar lo que yá ye ineludible, la tercer fola de la pandemia. El mieu y l’ansiedá nunca marcharon de la mente del profesoráu. Nun baxar la guardia foi l’elementu clave que dexó superar esta situación esceicional que mos toca vivir, que se carauteriza, básicamente, pola imprevisibilidá de los acontecimientos. Cada selmana toca valorar la situación y ver cómo puede facese frente a los retos.

Nesta situación, preséntensenos nuevos problemes a los que tanto’l profesoráu como la Conseyería d’Educación tendríemos de dir buscando rempuestes. Dende la perspeutiva de SUATEA tenemos per delantre trés elementos a tener en considerancia:

1/ La dificultá de compatibilizar la prevención de los contaxos por covid-19 per aciu la ventilación de les aules col caltenimientu d’una temperatura ambiental saludable: la normativa llaboral establez  pa ello un intervalu que va dende un mínimu de 17ºC a un máximu de 27ºC.

 El fríu nes aules marcó l’entamu d’esti segundu trimestre. Nesta selmana vimos cómo la necesidá de combatir la posible concentración del virus nel aire per mediu de l’apertura de ventanes pa ventilar les aules xenera’l problema añedíu de perbaxes temperatures, d’hasta 7◦C. Ello xenera unes condiciones ambientales térmiques non saludables  que previsiblemente se caltengan nos más de dos meses d’iviernu que mos queden.

Nes xuntes celebraes la pasada seronda de los Comités de Prevención y Salú Llaboral, los delegaos y delegaes de SUATEA yá plantegaron  qu’estos problemes diben asoceder y que yera urxente tomar midíes. Demandemos la compra de mididores de CO2   que nos dexaren saber cuándo ye necesario ventilar o la dotación  d’aparatos de filtráu d’aire con filtros HEPA ellí onde nun se pudiera ventilar o n’onde al ventilar van xenerase temperatures ambientales baxes.  A pesar d’estes alvertencies, nin  la Conseyería d’Educación nin el Gobiernu d’Asturies dotaron a los centros educativos con estos aparatos. Resulta más fácil  tomar midíes de “costu económicu cero” resalvando’l riesgu que suponen pa la salú del profesoráu y l’alumnáu.

Apocayá, los delegaos de salú de SUATEA cursaron un requerimientu énte la Conseyería d’Educación pa que, con calter urxente, adopte les midíes oportunes pa que les condiciones de llaborales del personal docente y les ambientales del alumnáu se desenvuelvan nunos espacios con temperatura afayadiza.

2/ La perspectiva d’un procesu selectivu de cara al branu de 2021 qu’afeuta a una parte significativa de la plantiya. Les oposiciones que se diben celebrar el branu pasáu quedaron suspendíes por cuenta de la pandemia. Impúnxose la idea de que se treslladaríen al branu d’anguaño 2021, dando por fecho que les condiciones sanitaries diben permitilo. Sicasí, otra vuelta más la evolución de los fechos empieza a plantegar duldes sobre si va ser posible la so realización.

Pal profesoráu afectáu ye de vital importancia saber si finalmente van llevase a cabu les oposiciones. En medio les condiciones estresantes de trabayu esistentes dende l’entamu de cursu y cola perspeutiva de que nun habrá una relaxación d’elles, conciliar la vida llaboral, vida personal y preparar oposiciones conviértese nun grave dificultá.

Anque tamos nun momentu de imprevisibilidá, la Conseyería debería d’empezar a plantegase la necesidá d’ufiertar dalgún tipu d’información al respective. Nun ye de recibu tener a una parte de plantiya faciendo un sobre-esfuerzu metanes la pandemia, compatibilizando les inxentes xeres burocrátiques asociaes al llabor docente, preparando a la vez les oposiciones p’anunciar finalmente la so suspensión énte les dificultaes pa garantizar les correutes garantíes sanitaries que dexen celebrales.

3/ La necesidá d’amenorgar el nivel d’ansiedá énte la posibilidá de contaxos pasa por un rápidu procesu de vacunación del personal docente. A lo llargo del primer trimestre l’actividá escolar desenvolvióse ente andaes, en relación con casos aisllaos de procedencia esterior unes veces y a brotes surdíos por contaxos dientro de les mesmes aules n’otros. Pal profesoráu esta situación xenera una tensión permanente, mayor naquél que trabaya con alumnáu que nun usa mázcaru, una y bones la mesma actividá llectiva presencial significa un contactu estrechu col alumnáu.

El profesoráu amosóse capaz de caltener el trabayu docente en mediu les dificultaes plantegaes. La so actividá viense demostrando esencial nestos momentos pa garantizar el desenvolvimientu de diverses actividaes nesta dómina de Nueva Normalidá. El fracasu de la educación presencial tendría un duru impactu nesta fase que se denominó de nueva normalidá. La meyora de la tercera fola ta suponiendo la suspensión de bona parte de les actividaes llectives en dellos países europeos.

Pal profesoráu asturianu sería una inyeición de moral y un aliviu saber cuálos son los planes de la Conseyería y del Gobiernu asturianu no que cinca al plan de vacunación. Un calendariu qu’ufierte un horizonte rápidu del procesu de vacunación va suponer, ensin dulda, el meyor de los estímulos pa que’l llabor docente presencial puea siguir desenvolviéndose como hasta agora.

Uviéu (Asturies) 15 de xineru 2021

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348