Home > Asturianu > El PP pretende arrequexar más tovía la llingua asturiana nel sistema educativu

El PP pretende arrequexar más tovía la llingua asturiana nel sistema educativu

Les pretensiones d’esi partíu d’enanchar l’abanicu d’asignatures de llibre configuración suponen un intentu de marxinar la llingua asturiana

Con motivu de la iniciativa presentada pol grupu parlamentariu del PP na Xunta Xeneral pretendiendo que la Conseyería d’Educación modifique la ufierta d’asignatures de llibre configuración nel nuevu Currículu d’Educación Primaria, pa que l’asignatura de Llingua Asturiana entre a competir con otres materies,  SUATEA quier manifestar que:

a)    El nuevu currículu ye una consecuencia de l’aprobación en Madrid de la nueva llei d’educación, la LOMCE, qu’obliga a modificar los currículos de toles etapes educatives non universitaries.

b)    Nun ta de más recordar que nel primer borrador de la LOMCE desapaecía materialmente la posibilidá d’estudiar Llingua Asturiana, dao que namás apaecíen les llingües cooficiales. Foi la presión ciudadana, y mui especialmente la d’esti sindicatu, la que fexo posible que na versión definitiva siga la puerta abierta pal so estudiu.

c)    Hasta agora, el currículu d’Educación Primaria incluyía, en cumplimientu de la Llei d’Usu del Bable/Asturianu de 1998, fecha a iniciativa del propiu PP, la voluntariedá de l’asignatura de Llingua Asturiana (o Gallego-Asturiano nel so ámbitu). Los escolinos podíen escoyer ente dar la materia o una alternativa a la mesma, qu’en nengún casu suponía avance curricular.

d)    La nueva versión del currículu ellaboráu pola Conseyería d’Educación mete nel apartáu d’asignatures de llibre configuración a la Llingua Asturiana y, como alternativa a la mesma, Cultura Asturiana. Nun supón una meyora pa la Llingua Asturiana respecto a la situación anterior. Sí, en cambio, introduz un mínimu de seriedá en tanto que se pon como alternativa a la mesma una asignatura reglada, Cultura Asturiana, que valdrá pa meter conteníos de la nuestra comunidá nun currículu onde Asturies ta ausente dafechu, dao que’l ministeriu nun dexa meter talos conteníos nes materies troncales.

e)    La pretensión del PP d’enanchar esi abanicu d’optatividá, supuestamente faciéndose eco d’un clamor social que la realidá desmiente, queriendo meter llingües estranxeres nun currículu sobresaturáu de les mesmes amuesa un desconocimientu absolutu de la realidá educativa asturiana, amás de dexar bien claro que la so pretensión ye que los escolinos estudien cualesquier otra materia anantes de conocer la llingua y/o la cultura d’Asturies.

f)    Resulta un exerciciu d’hipocresía escandalosu falar del “derechu a la llibre elección” pa intentar arrequexar a la llingua asturiana del sistema educativu mientres s’apoya una llei que sigue obligando a ufiertar la Relixón Católica non una sinón dos veces en toles etapes obligatories precisamente pa que los estudiantes puean estudiar si quieren la so alternativa, Valores Sociales. Asignatura esta de Relixón, por cierto, que n’Asturies va cuntar con más carga horaria que la prevista na propia LOMCE.

g)    Esta iniciativa ye, en definitiva, un nuevu intentu por espulsar del sistema educativu a la llingua asturiana, o nel so defectu mantenela nel modelu de precariedá permanente que lleva teniendo dende va trenta años con toos y caún de los gobiernos que se fueron sucediendo nel Principáu. La responsabilidá d’esta situación ye de tolos partíos que tuvieron o tienen responsabilidaes de gobiernu, polo que dende SUATEA encamentamos a tolos grupos parlamentarios a qu’igüen d’una vez esta situación y aprueben en definitiva’l marcu llegal amañosu pa torgar estos ataques, que nun ye otru que la oficialidá.

VER PDF

Esta entrada tamién se puede consultar en: Castellanu