Home > Comunicaos > El personal educativu nun sema odiu, namás cumple cole lleis

El personal educativu nun sema odiu, namás cumple cole lleis

Les palabres del dirixente del Partíu Popular de Cataluña, Javier García Albiol, nes qu’afirma que “Na mayoría de les escueles públiques de Cataluña edúcase para odiar a España” déxenmos plasmaos.

L’aumentu de tensión que ta xenerando’l conflictu ente’l Gobiernu de la Generalitat de Cataluña y el Gobiernu Central amenaza con da-y pasu a una fase na que cualquier afirmación, anque paeza tosca y falsa, pue llegar a ser posible.

Dende SUATEA queremos manifestar la nuesa indignación énte esti tipu d’afirmaciones. Nun conocemos la esistencia de nenguna escuela na que s’enseñe a odiar. La so función ye educar y cónstanos qu’asina se fai col esfuerzu de miles de docentes a pesar la masificación de les aules y la precariedá de medios de los que disponen.

El personal docente tien como misión educar a la futura ciudadanía en valores como la tolerancia, la solidaridá, la importancia del caltenimientu de la paz, etc. Eso ye lo qu’axusten les lleis educatives y ye lo que faen. Un asuntu distintu ye que pa defender les propuestes polítiques particulares se decida recurrir a cualquier argumentu pa la so defensa, incluyida la mentira y la calumnia.

Conocimos tamién estos díes delles afirmaciones asemeyaes referíes a los docentes de sindicatos como la UCSTE, sindicatu d’enseñantes de Cataluña col que SUATEA caltien relaciones fraternales. Más allá de manifestar la nuesa solidaridá empezamos a sospechar que tamos énte una campaña que tien como oxetivu desprestixar el trabayu cotidianu que se realiza na escuela pública col usu d’argumentaciones basaes na mentira. El modelu educativu qu’esiste en Cataluña respuende al sentir de la inmensa mayoría de la sociedá, si tenemos en cuenta los niveles de representatividá de los sindicatos que lu defenden.

Lo que más nos llama l’atención ye’l fechu de que los que  falen de adoctrinamientu ideolóxicu son quien impunxeron una llei como la LOMCE, refugada polos docentes, les families y otros sectores relacionaos col mundu de la educación. Dicha llei impón programes y currículos educativos con una visión ideolóxica sesgada que foi denunciada dende múltiples campos. Que nos falen de adoctrinamiento quien defenden el trabayu d’un Ministru como Wert, que llegó a afirmar nel Parlamentu qu’el so oxetivu yera “españolizar al alumnáu de Cataluña”, ye una verdadera ofiensa que refugamos cola máxima enerxía.

 

Uviéu 17  d’ochobre 2017

Esta entrada tamién se puede consultar en: Castellanu