Home > Aición sindical > El parlamentu asturianu aprueba una PNL qu’esixe un nuevu alcuerdu d’interinidá.

El parlamentu asturianu aprueba una PNL qu’esixe un nuevu alcuerdu d’interinidá.

EL PARLAMENTU ASTURIANU APRUEBA UNA PROPOSICIÓN NON DE LLEI QU’ESIXE LA NEGOCIACIÓN D’UN NUEVU ALCUERDU DE PROFESORÁU INTERÍN ASTURIANU: UNA OPORTUNIDÁ PA GARANTIZAR LA SO ESTABILIDÁ Y ACABAR COLA DISCRIMINACIÓN

Esti vienres 19 de febreru de 2016, el Plenu de la Xunta Xeneral del Principáu aprobó una Proposición non de Llei (PNL), a propuesta de PODEMOS y col sofitu de los grupos parlamentarios del Partíu Popular y Foro Asturies, y parcialmente d’Izquierda Xunida y Ciudadanos, que pretende que la Conseyería d’Educación abra la negociación d’un nuevu Alcuerdu de profesoráu interín n’Asturies diametralmente opuestu nel so espíritu al qu’anguaño ta en vigor. La mayoría parlamentaria inhabilita de facto l’Alcuerdu aprobáu en 2014, robláu por FETE-UXT y ANPE, que xeneró munches protestes per parte del profesoráu interín asturianu.

SUATEA congratúlase de que’l parlamentu asturianu reconoza la necesidá d’acabar cola discriminación que sufre’l profesoráu asturianu respectu al d’otres comunidaes y que s’encamiente al gobiernu a avanzar na garantía d’estabilidá pa esti colectivu docente, que ye casi’l 30 % de la plantiya de los centros públicos non universitarios.

L’Alcuerdu actual pol que se regulen les condiciones de trabayu y el sistema d’ellaboración, xestión y funcionamientu de les llistes d’interinidá venceya directamente cualquier procesu selectivu con eses llistes, que son reellaboraes y rebaremaes dempués de cada oposición. El profesoráu interín asturianu carez la rotación permanente nel empléu y l’ausencia d’estabilidá, cosa que nun asocede n’otros territorios, onde les llistes nun son rebaremaes y el profesoráu interín gocia de daqué forma d’estabilidá, lo que supón una clara desventaxa y discriminación pa los interinos asturianos.

Les razones poles que ye necesario algamar un nuevu Alcuerdu n’Asturies son les siguientes:

  • Dende l’asunción de competencies n’Educación nel añu 2000, el profesoráu interín asturianu nun tien estabilidá de nengún tipu y vive na rotación permanente, pos nun hai nin estabilidá de llistes, que se rebaremen cada vez que se celebren oposiciones, nin compromisu de contratación.
  • El fechu de que se reellaboren y rebaremen les llistes cada vez que se convoquen oposiciones surte efectu llamada sobre aspirantes de territorios de la nuesa redolada, que, con sistemes de xestión de llistes pesllaes nos sos territorios (País Vascu, Cantabria y Galicia, por casu), ven n’Asturies una oportunidá de trabayu. Esto supón que’l profesoráu interín asturianu tien que competir con más aspirantes, tantu na oposición como na llista d’aspirantes resultante.
  • El profesoráu interín asturianu ta obligáu a presentase a les oposiciones cada vez que se convoquen, anque yá les superara dalguna vegada (el 80% aprobar dalguna vegada ensin llograr plaza). Ye verdá que pue escoyer la nota más favorable del añu 2000 acá, pero’l problema ye que munches especialidaes nun se convocaron dende va décades y que’l profesoráu nun puede apurrir nota más favorable (anguaño convóquense delles especialidaes que nun fueron convocaes dende fai más de venti años).
  • En dellos territorios protexen a los y les docentes interinos mayores de 55 años con contratos indefiníos hasta la xubilación. Dende va décades, hubo escasa o nenguna ufierta d’empléu docente en delles especialidaes y ello derivó en qu’hai profesoráu interín que supera los 50 años que, con esti nefastu sistema d’organización de llistes, la convocatoria d’oposiciones d’anguaño supón-yos una llotería de consecuencies catastrófiques si nun llogren una bona nota.
  • P’acceder a cualquier llista d’aspirantes a interinidá, ye obligatorio presentase a les oposiciones, lo que nun dexa que los nuevos titulaos puedan tar en delles llistes pa les que la so titulación-yos reconoz idoneidá. Lo mesmo-yos pasa a los que tán en bolses (llistes que se constitúin una vegada escosada les llista primera), que tienen qu’optar por una única especialidá.
  • De resultes de les escases ufiertes d’empléu docente durante los últimos años, la tasa de profesoráu interín incrementóse n’Asturies hasta un 27% de la plantiya docente, lo que ye un auténticu problema pal sistema educativu asturianu, que funciona con plantiyes docentes bien inestables. Por tanto, ye necesario arbitrar midíes que dexen estabilizar les plantiyes, ente les que taríen la convocatoria d’ufiertes d’empléu públicu docente y l’estabilidá del profesoráu interín, que, per otra parte, tien esperiencia y muncho qu’apurrir a la enseñanza, lo que sería bonu pal sistema educativu nel so conxuntu.
  • Per otra parte, dientro de la Proposición non de Llei aprobóse que s’incluyan clauses específiques destinaes a garantizar el cumplimientu de los porcentaxes de profesoráu con discapacidá nes llistes de profesoráu interín.
  • Por too ello, con una propuesta de places relativamente amplia como ye la d’anguaño y que les sos consecuencies van tener lóxicamente más incidencia ente los docentes que nun llogren la plaza, ye imprescindible axustar un nuevu Alcuerdu d’interinidá, abordando una nueva forma de xestión y funcionamientu de les llistes nes que prevaleza l’antigüedá per delantre d’otros criterios, que se desvenceyen de les oposiciones y que garanticen una estabilidá pa quien ta yá trabayando.

Secretariáu d’Asturies de SUATEA
Uviéu, 19 de febreru de 2016

Noticies na prensa:

La Nueva España

El Comercio

Esta entrada tamién se puede consultar en: Castellanu