Home > Aición sindical > El parlamentu asturianu aprueba dos Proposiciones qu’avalen les tesis de SUATEA

El parlamentu asturianu aprueba dos Proposiciones qu’avalen les tesis de SUATEA

SUATEA solicitó, con calter urxente, un conceyu col Conseyeru d’Educación pa encamentalu a la negociación d’un nuevu alcuerdu del profesoráu interín y a la suspensión del calendariu d’implantación de la LOMCE. Les dos Proposiciones non de Llei aprobaes nel Parlamentu asturianu, el 19 y 26 de febreru respectivamente, enconten les tesis que nesti sindicatu venimos reivindicando dende hai yá enforma tiempu.

Na primera d’elles, sofitada por tola oposición parlamentaria, encamiéntase al Conseyu de Gobiernu del Principáu a negociar y ellaborar, col mayor baramentu, un nuevu Alcuerdu d’interinidá nel que prevaleza l’antigüedá frente a otros criterios y onde s’incluyan clauses específiques de protección al profesoráu mayor de 55 años. Un alcuerdu que tien de ser aplicáu nes llistes que salgan de los procesos selectivos d’esti cursu escolar.

Na segunda, interpuesta por PODEMOS y sofitada por PSOE, IX y cola abstención de Ciudadanos, encamiéntase a dirixise al Gobiernu central pa esixir la inmediata derogación y suspensión de l’aplicación de la LOMCE. Esto afectaría a la reválida de 6º de Primaria, que nun se celebraría y a la presión que sufre’l profesoráu de Secundaria na realización de les nueves programaciones, trabayu inxente que se ta esixendo ensin tener entá unos criterios definíos y coherentes ante toles duldes plantegaes polos docentes.

Dende SUATEA consideramos que se deben de tomar midíes inmediates dende la Conseyería d’Educación que respuendan por el cumplimientu d’estes proposiciones aprobaes y asina lo vamos tresmitir al Conseyeru.

PNL alcuerdu d’interinidá (PDF)
PNL paralización LOMCE (PDF)

Esta entrada tamién se puede consultar en: Castellanu