Home > Aición sindical > El paripé queda pa prau

El paripé queda pa prau

ANPE, FETE-UGT, ConseyeriaEl refugu unánime de la Mesa Sectorial d’Educación a la modificación del Decretu sobre los Planes d’Evaluación demuestra que les pretensiones de l’alministración y de los sindicatos que promovieron nel so momentu la discriminación salarial de cásique’l 40% de los docentes yera fumu.

Pero yá nun engañen a naide. El gobiernu convocó na viéspora de les elecciones sindicales- nes que SUATEA algamó la mayoría- una Mesa Sectorial pa modificar el decretu relativu al Reglamentu de los Planes d’Evaluación. Un intentu d’influyir nos resultaos electorales y d’engañar al profesoráu.

La selmana anterior a les Elecciones los sindicatos UGT y ANPE, que firmaren la Llei d’Evaluación, prometíen al profesoráu interín faciendo campaña electoral la so inclusión nos Planes d’Evaluación cuando sabíen de sobra qu’esto ye imposible cola actual llei.
SUATEA lleva reiterando que ye asina porque los que mangaron la so firma p’avalar esta llei yeren conscientes dafechu qu’esto taba fecho asina precisamente pa discriminar tanto al profesoráu interín como a les persones que se punxeren males “más tiempu de la cuenta”, como tamién a los qu’aportaron a Asturies per concursu de tresllaos, como a los que fueren sacando oposiciones o a quien quixere axuntase al Plan d’Evaluación.

Asina remató’l paripé: d’una parte l’alministración almite media docena de frases que retoquen el testu inicial, y ente los que sofitaron la Llei d’Evaluación, d’una parte ANPE nun diendo a la Mesa Sectorial, probablemente pa nun tener que se pronunciar, y de la otra parte UGT refugando lo que defendieron hasta hai 4 díes.

Agora va resultar que lo que SUATEA lleva años diciendo ye lo que toos suscriben.

Al platu vendrás arbeyu….

Esta entrada tamién se puede consultar en: Castellanu