Home > Aición sindical > El nuevu Ministru d’Educación ignora les esixencies de paralización de la LOMCE

El nuevu Ministru d’Educación ignora les esixencies de paralización de la LOMCE

El ministru Ménez de Vigo ignora la esixencia mayoritaria de les nueves conseyeríes autonómiques de paralizar la LOMCE

SUATEA esixe al gobiernu asturianu que nun aplique la llei, que nun faiga la reválida de 6u. y se siente a negociar les condiciones llaborales del profesoráu

La primer Conferencia Sectorial d’Educación del ministru Méndez de Vigo acabó, a pesar del anunciu de les intenciones dialogantes del nuevu titular, cola reafirmación de la Llei Wert. L’anunciada voluntá de revisión del calandariu d’aplicación de la LOMCE quedó, como yera d’esperar, definitivamente desmentida y namás la paralización momentánea de les reválides d’ESO y Bachilleratu foi la única meyora aceptada pol ministeriu.

El restu de midíes propuestes por Íñigo Méndez son descaradamente electoralistes y l’escasu marxe de llexislatura nun les fai nada creíbles, como la insuficiente dotación económica pa l’alquisición de llibros de testu, la ellaboración d’un Llibru Blanco de la Función Docente, la propuesta d’un Plan de Convivencia Escolar, el Mapa d’Empleabilidá de la FP y el Plan de Conectividá de Centros Escolares.

El ministru, sicasí, ignoró que’l sistema públicu d’enseñanza sigue sometíu a los retayos impuestos pol so predecesor, especialmente’l Real Decretu 14/2012 de Midíes Urxentes de Racionalización del Gastu Públicu nel Ámbitu Educativu, qu’empioraron considerablemente la calidá educativa y les condiciones llaborales del profesoráu.

El desgastáu y caducu gobiernu de Mariano Rajoy nun fixo lo que tenía que facer tres les elecciones autonómiques, antemanar les elecciones xenerales. Llueñe d’esto, agárrase al poder y intenta atar too lo posible pa cuando yá nun lu detente, como se vio col proyectu de Presupuestos Xenerales del Estáu pa 2016.

L’actual mapa políticu evidencia la soledá del Partíu Popular pa siguir alantre cola so política educativa. Cola actual coxuntura política, caltener l’aplicación de la LOMCE escarez del mínimu sentíu de responsabilidá, y la declarada voluntá de diálogu del nuevu y fugaz titular Méndez de Vigo nun ye seria si nun se fai lo que la comunidá educativa y la sociedá polo xeneral reclamen, la lliquidación de la llei y l’apertura d’un diálogu real.

Ante l’entamu del nuevu cursu, dende SUATEA caltenemonos firmes ante’l MECD na esixencia de paralización de la LOMCE y encamentamos a la Conseyería d’Educación asturiana en que nun venza a les imposiciones d’un gobiernu que desprecia la llexitimidá de les urnes, que sía consecuente cola oposición manifestada ante la opinión pública y tome midíes concretes que demuestren una voluntá clara d’oposición al modelu educativu del PP. Consideramos imprescindible una paralización qu’evite’l caos nun futuru inmediatu y especialmente la non realización de la reválida de 6º de Primaria. Ye incomprensible que se detengan estes pruebes solamente en Secundaria y Bachilleratu, dexando sobre los más vulnerables, por edá, el pesu d’estes evaluaciones segregadoras que van marcar d’inmediato’l so futuru académicu.

N’Asturies tamos viviendo les consecuencies de los retayos con un progresivu deterioru de les condiciones llaborales del profesoráu y l’amenorgamientu de la plantiya nos centros. Esiximos d’esta nueva Conseyería qu’esanicie l’aumentu del horariu lectivu aplicáu en Secundaria, que se tengan en cuenta los criterios pedagóxicos y la calidá educativa como elementos que demanden un aumentu del númberu de docentes y qu’acabe cola peralta tasa d’interinidá y de medies xornaes que condicionen el funcionamientu normal de los centros. Tampoco ye suficiente la manifestación d’opiniones al respective de la creación de la especialidá del asturianu como fixo l’anterior conseyera, llevamos munchos años reivindicando la dignificación d’esta materia y tienen de dase pasos concretos, asumiendo les competencies que’l Gobiernu asturianu tien n’educación en llugar d’echar balones fuera y dexar toles decisiones en manos del ministeriu.

Uviéu, 14 d’agostu de 2015

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743