Home > Comunicaos > El Ministeriu dexa pa les Autonomíes les condiciones nes que se va desenvolver el cursu próximu

El Ministeriu dexa pa les Autonomíes les condiciones nes que se va desenvolver el cursu próximu

Tres dellos cambeos de posición tocantes a la ratio por aula, agora namás qu’establez una serie d’encamientos que tampoco se van a poder cumplir.

El Ministeriu d’Educación y Formación Profesional asoleyó les midíes de prevención, hixene y promoción de la salú énte’l covid-19 nos centros educativos pal cursu 2020-21. Na práctica, trátase d’una riestra d’encamientos pa les Comunidaes Autónomes que difícilmente se van a llevar a efectu.

Dende SUATEA y los STEs-i, consideramos que’l Ministeriu arrenunció a la capacidá que tien d’establecer lexislación normativa básica qu’obliga a tol Estáu, en temes fundamentales como’l númberu máximu d’estudiantes que puede haber al mesmu tiempu nun aula, que ye una midida clave dende’l puntu de vista pedagóxicu pa la meyora de la calidá de la enseñanza y que, nesta situación de crisis sanitaria, conviértese tamién n’una ferramienta imprescindible para evitar l’espardimientu de posibles casos de contaxos.

Rescampla que’l Ministeriu que dirixe Isabel Celaá comparte esta reflexón, yá qu’esti foi unu de los puntos principales sobro’l que xiraron les propuestes ministeriales: de sostener qu’había que llindar la presencia n’aula a 15 alumnes y alumnos, pasó a caltener que podíen ser 20 y finalmente a falar de “agrupaciones convivenciales que funcionen a manera de families”, que pueden incluyir a un númberu d’alumnáu que llegue a 25. Esto ye, en realidá tratar de la llimitación llegal actual.

A última hora, pal próximu cursu, la única novedá lexislativa va ser la establecida nel Real Decretu llei 21/2020 de 9 xunu que fai referencia al caltenimientu de la distancia de seguridá nos centros educativos, l’usu del mázcaru o la llimpieza y procesu de desinfección de los centros educativos.

Y, al arrenunciar a llexislar sobro aspeutos tan determinantes como ratios o’l destín de los 2.000 millones d’euros que’l gobiernu d’España va poner a disposición de les Comunidaes Autónomes pa educación en septiembre, el Ministeriu ta faciendo posible que les condiciones nos que se desenvuelva la enseñanza’l próximu cursu nun sían les afayadices. Delles alministraciones autonómiques, como les de la Comunidá de Madrid o d’Andalucía, yá anunciaron la so intención d’esaniciar unidaes de los centros públicos: esto ye, nin siquier sobro’l papel manifiesten una intención d’ameyorar les condiciones, sinón al contrariu, pues amuesen claramente la so intención d’empiorales en función de criterios que’l Ministeriu tendría de torgar.

Pero, amás, estes midíes que’l Ministeriu d’Educación propón a les Autonomíes, tienen otra gran dificultá: nun se van poder cumplir. N’efectu, eses agrupaciones convivenciales de les que fala, nun van poder funcionar de manera aisllada, ensin rellacionase col restu de persones del centru educativu. Por casu, un colexu d’Infantil y Primaria de 2 llínees, cuenta con 18 clases. Pa que caúna d’elles pudiera funcionar como una agrupación independiente ensin contactu coles demás, esi colexu tendría d’establecer 18 turnos distintos d’entrada, venti recreos distintos o 18 turnos de salida: daqué dafechu imposible.

Tocantes a Asturies, l’Alministración comunicó la intención de ratios máximes de 15, pero inda ta por determinar y esperamos qu’en próximes feches se convoque la Mesa Sectorial. Somos conscientes de que l’amenorgamientu de ratios xenera problemes d’espacios en dellos centros educativos, especialmente los de zones urbanes, y va obligar a tomar midíes, como l’usu d’espacios municipales o d’otra triba que tean cercanos a los centros; tamién se plantegaron establecer turnos de clase, anque xeneraría problemes d’organización pa los centros y problemes de conciliación familiar. Dende SUATEA, vamos defender que se destine una partida presupuestaria estraordinaria pa contratar más docentes pa poder caltener ratios de 12/15 a lo más, pues esa va ser la clave que va dexar encarar la pandemia de forma equilibrada y coles midíes de seguridá necesaries.

Munchos de los problemes a los qu’enfrentamos quedaríen resueltos si’l nivel d’inversión n’educación estatal fora’l del restu d’estaos europeos: una media del 5% del PIB (nós venimos reivindicando un 7%). La educación pública nun puede quedar retrasada una vegada más nuna situación de crisis. Si se dediquen 2.000 millones a educación (y el Ministeriu arrenuncia a llexislar qu’esa partida tenga un destín esclusivu pa la enseñanza pública) y pal sector del automóvil o del turismu dediquen partíes que doblen o tripliquen esa cantidá, el mensaxe ye claru: la educación pública nun ye una prioridá y eso ye daqué que nun se puede dexar una sociedá que pretenda ser equitativa, xusta y con un futuru de porgüeyu.

El Secretariáu de SUATEA

N’Uviéu a de xunu de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344