El llibru blancu desacredita al profesoráu

EL LLIBRU BLANCU DEL MECD: DESACREDITAR AL PROFESORÁU PA XUSTIFICAR NUEVOS AXUSTES NA EDUCACIÓN

Na presentación del llibru blancu per parte del Ministeriu d’Educación en plena campaña electoral, avánzase un grau más nel intentu de descreitu del profesoráu del nuestru país. El PP cunta col inestimable sofitu d’otres fuerces polítiques p’aumentar el coru de los qu’achaquen al profesoráu la responsabilidá de los males de la nuesa educación. Asina lo tamos viendo na presentación de los programes electorales y nel usu partidista del menoscabu del profesoráu nos debates ente candidatos.
Pero’l llibru blancu del profesor Marina, tanto na so versión amplia como na amenorgada, nun respuende a les mires creaes pol PP nel sentíu de sentar les bases pa un debate sobre la educación nel nuestru país. Llimítase a facer gala d’un notable desconocimientu de la realidá educativa actual y a ignorar los verdaderos problemes que los años de retayos y depauperación traxeron a la enseñanza pública.
1- El llibru blancu escarez d’un analís seriu y rigurosu alrodiu de l’actual situación de la educación pública. Pásase de puntilles sobre l’aumentu de xeres, del númberu d’alumnáu al qu’atender, o del despidu de 40.000 docentes nos últimos años. Nun hai mención a les condiciones nes que se desenvuelven les actividaes docentes nin sobre les dificultaes que traviesen les families y l’alumnáu. Tampoco s’aborda la situación escepcional, respectu al restu d’Europa, d’un sistema educativu onde la enseñanza privada subvencionada al traviés de los conciertos educativos detrae cantidaes inxentes de fondos que tendríen de ser destinaos a la enseñanza pública. El llibru blancu prescinde de too marcu socioeconómicu nun país nel qu’esisten millones de neños y neñes per debaxo del umbral de la probeza.
2. Les propuestes de Marina amuesen un desconocimientu fondu de la realidá na que los docentes desenvuelven el so llabor. Nun hai mención dalguna a que los principales problemes a los que güei s’enfrenten tienen que ver cola falta de sofitos pa realizar les sos funciones, la falta de tiempu material pa desenvolver el so trabayu debíu al aumentu del horariu llectivu en secundaria, FP y enseñances de réxime especial, la falta de profesoráu tutor y especialista en primaria y la medría del númberu d’alumnos per aula. Sí se fai referencia a la comparanza con otros países pa concluyir que, en realidá, eses peores condiciones llaborales nun inciden na vida de los docentes nel nuesu país. Tampoco al so xuiciu tuvo importancia dalguna l’amenorgamientu drásticu del porcentaxe del PIB destináu a educación, asuntu que nin siquier ye mentáu de raspión nel so llibru. Pasar d’un 5’1% a un 4’3% en 2013 nun paez ser dignu de mención nel analís de partida.
3. Les recetes apurríes por Marina nel so llibru blancu básense nel so interés por demostrar una serie de tesis de forma preconcebida y non n’estudios rigurosos de la realidá educativa. La solución qu’ufierta a los problemes educativos nun consiste n’ameyorar el gastu del educativu nel sector públicu. Pa él, la falta d’evaluación del profesoráu ye la base de tolos males. Y ello ensin argumentación dalguna. Namás apurre, pa sofitar la so argumentación, comparancies con dellos países onde sí s’aplicaron. Inclusive llega a reivindicar lo asocedío en Chicago y Nueva York nel cuelmu de la desfachatez: recordemos que’l sistema siguíu nestes ciudaes, que sacó a la cai a miles de docentes y de families pa protestar polo indigno del mesmu, consiste no siguiente: en sometiendo a evaluación a una determinada escuela y equipu educativu, si los resultaos son desfavorables, la escuela ve amenorgaos los so fondos y el profesoráu los sos salarios. Si vuelve asoceder lo mesmo tres una segunda evaluación, la receta ye la mesma. Esto ye, en cuenta de detectar problemes y ayudar a superalos, vuelve castigase a esa comunidá educativa. Si tres la tercer evaluación los resultaos siguen siendo malos, la escuela ye cerrada o vendida y los sos docentes despidíos. Ésta ye no fondero la filosofía del señor Marina.
4. P’aplicar eses fórmules hai que vencer resistencies: esaniciar como interlocutores válidos a los sindicatos docentes – dalgunos como SUATEA y la Confederación de STEs yá dexamos claro’l refugu a les sos intenciones-; reforzar la figura de los directores pa que puedan conformar los claustros a la so guisa y proveer les vacantes según la so voluntá; poder despidir a los profesores que se resistan a les “innovaciones”, yá que’l calter funcionarial d’éstos tien de ser puestu en cuestión como asocede n’otros países..
5. Frente a les demandes de la inmensa mayoría del profesoráu que ta yá esperimentando lo que supón la LOMCE, Marina pretende reforzar los aspectos más negativos de la mesma: la creación d’una carrera docente onde la so culminación sería convertise n’asesor del conseyeru d’educación, la introducción d’un xerente nos centros y la evaluación como elementu punitivu na vida docente son dalgunos d’ellos. La introducción d’un sistema competitivu ente’l profesoráu ignora que lo que’l profesoráu reivindica ye’l sofitu al trabayu n’equipu, l’amenorgamientu de la carga horaria, la estabilización de les plantiyes docentes y la formación del profesoráu dientro del horariu llectivu…
6.- De llevase alantre la propuesta de Marina, la burocracia crecería de forma esponencial: les figures dedicaes a enllantar el sistema d’evaluación, los supervisores de los supervisores y les consecuencies sobre la inmensa mayoría de los docentes, seríen desastroses pal conxuntu del sistema educativu. Precisamente unu de los mayores problemes denunciaos polos docentes ye l’aumentu de les xeres burocrátiques deriváu del nuevu sistema impuestu cola LOMCE.
7.- DEP: el tan cacarexáu MIR conviértese na ampliación nun añu y nun cambéu de status del profesoráu. Anguaño’l profesoráu en práctiques cobra un salariu similar al de los sos colegues definitivos. D’aplicase la propuesta, el salariu d’un DEP podría ser equivalente al de los sos colegues MIR, alredor d’unos mil euros. Un bon aforru pal sistema. Tres la primer selección, nun hai garantíes de que’l periodu de práctiques dea accesu a la condición de funcionariu sinón que’l sistema actual, el d’oposiciones nun se pon en tela de xuiciu. Una doble selección que nun esiste nos países de la nuesa redolada.
8. El gran escaecíu ye’l profesoráu interín. Más de la cuarta parte de los docentes son interinos. La única mención que’l llibru blancu fai ye al so gran númberu pero nin una palabra sobre cómo estabilizalos nel empléu. Esta crecedera esponencial del profesoráu precariu prodúxose polos retayos y l’interés en siguir con un ERE xigantescu qu’esanició miles de puestos docentes estables al traviés de les xubilaciones ensin que se repunxeren nin una mínima parte de los mesmes. Paez qu’a esti profesoráu condérgaselu al olvidu y la espulsión del sistema públicu d’educación.
Estes son dalgunes de les reflexones tres una primer llectura del llamáu llibru blancu. Trátase de propuestes realizaes ensin tener cuenta al profesoráu, nin a les circunstancies nes que desempeña’l so llabor. Pretender abordar un debate educativu pa supuestamente ameyorar la enseñanza ensin cuntar colos sos principales protagonistes. Ye, poro, una iniciativa que naz muerta. Tres les elecciones, tienen de revertise los retayos, recuperar la inversión na educación pública, plantegase meyora de les condiciones nes que los docentes trabayen, garantizar una enseñanza pública de calidá pa toos y toes. La propuesta de Marina, llamentablemente, va en sentíu contrariu a lo que la inmensa mayoría esperamos.

Uviéu, 9 d’avientu de 2015