Home > Aición sindical > El gobiernu asturianu sigue alantre na aplicación de la LOMCE

El gobiernu asturianu sigue alantre na aplicación de la LOMCE

LOMCE NONMientres los nuevos gobiernos de les diferentes comunidaes, munches d’elles gobernaes agora pol PSOE, anuncien la non aplicación de la contrarreforma educativa, el gobiernu asturianu saliente, tando en funciones, sigue alantre na aplicación d’una llei nefasta pa la escuela pública

La publicación güei llunes nel BOPA del currículu de Bachilleratu, pel que’l gobiernu asturianu da un pasu más na aplicación de la llei Wert, la nefasta LOMCE que tantu refugu llevantó en tola comunidá educativa, llena de plasmu y enfadu a los sectores sociales enfotaos na defensa de la escuela pública. De plasmu porque resulta raro que, mientres los nuevos gobiernos de les comunidaes autónomes salíos de les elecciones del 24 de mayu -munchos d’ellos presidíos por militantes del PSOE- fagan bandera de la non aplicación de la LOMCE, el gobiernu asturianu, y especialmente la conseyera Ana González que tanto quixo facer creer estos tres años que yera una feroz enemiga de la contrarreforma educativa, se ponga a aplicala dócilmente nun contestu muncho más favorable agora a la so suspensión. Y d’enfadu porque resulta de mui poca lexitimidá qu’un gobiernu en funciones, tando tovía pendiente la formación d’unu nuevu que respuenda a la correlación de fuercies qu’espeyaron les últimes elecciones, se dedique a publicar decretos xusto amás cuando acaba’l calandariu llectivu y la comunidá escolar ta rematando’l cursu.

SUATEA quier amosar el so malcontentu por esta nueva falcatrúa de la Conseyería, enfotada n’aplicar una llei que yá ta prácticamente muerta, mientres va dos meses los sos representantes nel Conseyu Escolar del Principáu d’Asturies votaben, xunta la totalidá de demás sectores del mesmu, de forma unánime pidiendo a l’Alministración asturiana que nun aplicase la LOMCE pal cursu viniente, dau’l pocu tiempu que quedaba pal mesmu. ¿Qué sentíu tien votar una cosa nel Conseyu Escolar mientres se toma la decisión política de facer exactamente lo contrario, y amás nun contestu políticu muncho más favorable? ¿Ye la conseyera saliente consciente de les repercusiones negatives que va tener pa la escuela pública asturiana siguir col calandariu d’aplicación d’esta llei terrible?

N’Uviéu, a 29 de xunu del 2015
Secretariáu de SUATEA

Esta entrada tamién se puede consultar en: Castellanu