El cursu escolar empieza con despidos, falta de profesoráu y errores nes axudicaciones

Empieza’l cursu escolar y, otru añu más, bona parte de los centros desconoz, a 1 de setiembre, la composición de la totalidá del Claustru. La Conseyería d’Educación sigue faciendo cábales p’asignar media plaza más de tal o cual especialidá equí o alló, polo que les plantiyes docentes nun son, inda, les definitives; van terminar de perfilase, a lo menos, una selmana dempués de la incorporación del alumnáu’l 11 de setiembre. Esto supón dexar a alumnos y alumnes ensin clase de determinaes especialidaes hasta’l 18 de setiembre. Tamién implica que’l restu de profesoráu, yá incorporáu, tenga de cubrir eses ausencies faciendo guardies; que los equipos directivos nun puedan planiar y tresnar los horarios hasta que la Conseyería-yos autorice, o non, la dotación de personal que solicitaren yá a últimos de cursu; que’l profesoráu que s’incorpore’l 18 de setiembre, en llugar del día 1, va tener que ponese al día de les cuestiones d’organización y funcionamientu del so nuevu centru de destín a carrenderes, ensin información previa de les característiques particulares del alumnáu, de los programes y proyectos del centru, etc. Esto ye, lo que l’Alministración  aforra en sueldos pierdelo el so alumnáu en calidá d’enseñanza y les/los sos trabayadores en condiciones llaborales y en bienestar emocional.

Per otru llau, los errores na primer convocatoria de personal interino causen, como cada cursu, perxuicios irreparables a quien los sufre: persones que tendríen de ser convocaes y nun apaecen nos llistaos, baremos que la so puntuación tendría de correxise -dexando ameyorar la posición nes llistes- y permanecen inalteraos, places ensin axudicar que fueren ufiertaes y, polo tanto, solicitaes; según vacantes axudicaes, pero inesistentes. Nel primeru de los casos, el personal afectao queda en situación de desempléu mientres 15 díes. N’otros, les consecuencies derivaes d’estos errores endémicos son bayura: un contratu a xornada parcial cuando podríen optar a una xornada completa, sustituciones varies en llugar d’una vacante estable pa tol cursu, mayores desplazamientos o, directamente, mudances, o nun trabayar nada, dependiendo de la especialidá.

Mención aparte merez el colectivu interín del cuerpu a escastar de Profesores Técnicos de Formación Profesional. Mientes que n’otres comunidaes les alministraciones educatives dieron la cobertoria llegal necesaria pa nun echalos a la cai tres décades de serviciu, n’Asturies optaron pol desagospiu. Un desagospiu que yá entamó va trés años, con trés compañeros, que, poques gracies, nun recibieron nengún tipu d’indemnización dempués de 33 años trabayando pa esta Conseyería, y ensin cumplir los requisitos necesarios pa poder xubilase.

A la desidia institucional amestar la solidaridá abúlica del restu del colectivu docente, esmigayao, intencionadamente, en compartimientos estancos pa debilitar la llucha colectiva y, con ella, la negociación de meyores llaborales y el financiamientu de los servicios públicos. Entrín y non, empreses privaes, la mayoría relixoses, prepárense pa “emprender” nos nuevos nichos de mercáu: el primer ciclu d’Educación Infantil y el flamante sistema de Formación Profesional. Eso sí, cola paguina del Estáu.

El Secretariáu de SUATEA

N’Uviéua a 1 de setiembre de 2023