Home > Comunicaos > El cursu de nunca empezar

El cursu de nunca empezar

NIN L’EMPIEZU FOI “NORMAL”, NIN LOS PROBLEMES SON MERES DIFERENCIES “TÉCNIQUES”

Magar les increíbles declaraciones del Sr. Alonso, Conseyeru d’Educación, al respective d’un empiezu de cursu “normal” con dellos problemes “técnicos”, esti empiezu falta-y enforma pa ser normal. Lo mesmo qu’asocedió’l llunes en Primaria, l’empiezu de cursu güei en secundaria foi problemáticu, cuando non caóticu.

Que los centros diben tener dificultaes p’atender afechiscamente a la diversidá y llevar a términu los sos proyectos educativos, yá lo denunciamos cuando la Conseyería fixo pública la previsión de plantiyes para esti cursu. Alvertimos que yeren insuficientes, que nun respondíen a les necesidaes reales de los centros nin a les demandes de los sos equipos directivos, y que teníen como principal oxetivu aforrar costos. (Como lo demuestra, tamién, la medría de les medies xornaes, que llega al 45% nel cuerpu de profesoráu de secundaria)

Volvimos denunciar les dificultaes que tendríen los centros al entamu’l cursu cuando nin siquier se cubrieron les vacantes previstes, y denunciemos igualmente que nun se vuelvan a convocar hasta’l día 18, lo que quier dicir que’l profesoráu que falta nun se va incorporar a los centros hasta’l día 25, casi un mes dempués d’empezar el cursu y dos selmanes dempués del empiezu de les clases.

La mala planificación de la Conseyería raya la desidia yá que fueron munchos los centros onde l’empiezu cursu foi too menos normal. Nun someru sondéu realizáu esta mañana por SUATEA en dellos centros de distintos conceyos atopamos con que lo “normal” ye que les plantiyes tuvieren incompletes. El casu más increíble ye’l del IES Calderón de la Barca, onde falten 13 profesores por axudicar. Teniendo en cuenta qu’otros trés tán de viaxe d’estudios, la plantiya vese amenorgada nun 20%. Pero nun ye una situación escepcional: En Xixón falten 10 nel IES Doña Jimena, 7 nel IES Xovellanos, 4 nel IES Feijoo; n’Uviéu falten 8 nel IES Alfonso II, 5 nel IES La Ería, 12 nel IES Monte Naranco; en Castrillón falten 4 nel IES Isla de la Deva; en Mieres falten 6 nel IES El Batán; en Pola de Siero falten 5 nel IES Juan de Villanueva,… Son exemplos d’un malísimu empiezu de cursu en non pocos centros.

Ye comprensible que se produzan delles ausencies por dalgún pequenu desaxuste o por baxes d’última hora; lo que nun ye comprensible, nin almitible, ye tan gran desatín. Nin siquier se tuvieron en cuenta vacantes conocíes con abonda antelación como les causaes por comisiones de serviciu, lliberaciones sindicales, horariu pa equipos directivos,… Tampoco ye almitible l’absoluta falta d’autocrítica d’una Conseyería que niega una realidá que va más allá del difícil empiezu de cursu: la escasez de les plantiyes y el caltenimientu de la calidá a costa del sobreesfuerzu del profesoráu.

Cónstanos que l’alumnáu va ser atendíu, magar les torgues, hasta que la situación se normalice, pero ye una atención que:

  •  Supón empezar con un horariu provisional.
  • Multiplica’l trabayu directivu na organización del centru.
  • Fuerza al profesoráu a una sobrecarga de trabayu p’atender a tol alumnáu.
  • Torga que parte del alumnáu tenga un profesor/a de referencia pos parte del profesoráu por asignar son tutores.
  • Torga que puedan empezar los sofitos, yá menguaos de por sí por cuenta de la escasez d’hores y al insuficiente númberu de profesores de Pedagoxía Terapéutica.
  • Torga o retrasa’l desenvolvimientu de proyectos, usu de biblioteques, TIC …
  • Retrasa l’empiezu efectivu del cursu en munchos centros en, pelo menos dos selmanes.

Esti empiezu de cursu foi “normal” porque, desafortunadamente, lo que ta asocediendo esti cursu yá asocedió antes y empieza a ser considerao normal per parte del Sr. Conseyeru. Por eso namás empezar el cursu yá entamaron les protestes anunciaes pola comunidá escolar del CP Evaristo Valle y  del IES Calderón de la Barca (dambos en Xixón). Otres pueden siguir. SUATEA sofita y va sofitar lo que considera xustes protestes por una escuela pública digna y de calidá y anima al profesoráu, en particular, y a les comunidaes educatives polo xeneral, a que nun se resignen a una precariedá impuesta.

Esta entrada tamién se puede consultar en: Castellanu