El Conseyu Escolar refuga’l programa habLE

El Conseyu Escolar del Principáu d’Asturies votó ayerI que NON al programa habLE, la nueva versión del vieyu Programa Billingüe. Recordemos que’l Conseyu Escolar ye’l órganu de representación de la comunidá educativa, poro, el posicionamientu mayoritariu d’ésta ye contrariu a esti programa. Nel propiu plenu del Conseyu pudieron vese intervenciones de representantes del profesoráu y de les families nes que se señaló que’l programa billingüe suponía una torga pa l’adquisción de los conocimientos y que tenía un fuerte carauter segregador. Dende SUATEA presentamos un votu particular contra’l programa, que reproducimos a continuación:

Dende’l SUATEA presentamos un votu particular EN CONTRA d’esta resolución y de tol trasfondu de la mesma.
L’estudiu fechu pola Federación d’Estudios d’Economía Aplicada y la Universidá Complutense de Madrid [1] dexa bien claro que’l billingüismu supón una merma na adquisición de conteníos, que ye más significativa nel alumnáu con families ensin estudios. Nel mismu sentíu, l’informe publicáu pol Observatoriu pola Escuela Pública [2] denuncia l’aprobetamientu de los conteníos y una segregación escolar esplícita.

El procesu d’enseñanza-aprendizaxe tien siempre unes barreres llingüístiques clares, ya qu’esiste una diferencia ente lo que se diz y lo que s’entiende. Diferencia que parte a so vez del vocabulariu del alumnau y los conocimientos previos, pero tamién de les posibilidaes de múltiple interpretación d’un mesmu cunceutu o de les sutileces del llinguaxe. Desenvolver esti procesu, de por sí difícil, nuna llingua que nun ye ni la propia del profesoráu ni, muncho menos entá, la del alumnáu (que pue tener un conocimientu mui, mui llendáu de la mesma), ye dificultar tovía más el procesu. Esto ye tan evidente que solo pue negase dende’l puru aneciamientu. Además, como suel ocurrir cuando se dificulta’l procesu d’enseñanza-aprendizaxe, esti aumentu de la dificultá nun ye homoxéneu, sinon qu’afeuta más precisamente al que más dificultaes tien: al que tien peores competencies llingüístiques, al que tien menos capacidá d’abstración o de razonamientu (al que se-y aumenten les dificultaes que ya tendría na llingua propia), pero tamién al que tien un entornu familiar culturalmente más aprobetayau.

Esto ye: Precisamente ye más lesivo col alumnáu más vulnerable.

Por too lo anterior, votamos NON con rotundidá a esti programa.

[1] ANGHEL, B. CABRALES, A. & CARRO, JM. (2013). Evaluación de un programa de educación bilingüe en España: El impacto más allá del aprendizaje del idioma extranjero.
[2] http://oxep.org/el-bilinguismo/ (Consultado el 24/04/2023)