Home > Aición sindical > Educación vuelve a imponer a los centros la xestión de les beques pa llibros de testu

Educación vuelve a imponer a los centros la xestión de les beques pa llibros de testu

La Conseyería d’Educación incumple la so palabra y vuelve a imponer a los centros la xestión de les beques pa llibros de testu

L’otru cursu, depués del refugu masivu de los centros educativos a la imposición de ser ellos los que xestionasen les beques pa llibros de testu concedíes a les families que tienen derechu a elles sigún la normativa vixente, la conseyería d’Educación comprometióse a que per dos cursos esta midida fuera voluntaria per parte de los centros.

Pero faltando a la so palabra, la conseyería reunió a les direcciones y tresmitió-yos que son ellos los que tienen que xestionar l’ayuda de 105 euros por familia pa criar un bancu de llibros. Cada familia apaecerá nel BOPA cola asignación de dicha cantidá, pero quien va recibila va ser el centru educativu que tendrá que facer un bancu de llibros pa emprestalos al alumnáu del centru, empezando pel que tien derechu a beca de llibros.

Esto supondrá qu’onde son les AMPAs les que xestionan el préstamu de libros éstes habrán cesar nesta actividá pa cede-yla a los equipos directivos de los centros.

Ente dichos equipos ta añerando’l malcontentu en primer llugar porque la conseyería faltó a la so palabra de qu’esta implantación diba facese de forma voluntaria. Amás la mayoría de los centros educativos nun tienen personal abondu p’atender un volume de trabayu curiosu como’l que supón poner en marcha esti tipu de programes.

De segundes, la dotación económica de 105 euros nun da pa cubrir mínimamente les necesidaes de llibros pa cada curso. Trátase amás d’una asignación nominal a cada familia colo que podría ponese en tela de xuiciu la xestión per parte de los centros d’unes cantidaes destinaes personalmente al alumnáu becariu.

Pero amás trátase d’una midida que se toma cuando nos centros educativos de secundaria síguese ensin conocer el currículum col que va trabayase’l próximu cursu. Pesie a les peticiones d’aplazamientu de l’aplicación de la LOMCE la Conseyería publicó un tercer borraor de currículu n’ESO y Bachilleratu que naide sabe si será definitivu o si depués de les Elecciones del próximu 24 de mayu va aplazase esta llei que comporta cambios curriculares, lo que fai más absurda la neciura de la Conseyería d’Educación.

Por ello dende SUATEA desiximos que nun s’aplique esta normativa pal próximu cursu y que se plantegue claramente un sistema de llibros de testu y material escolar de baldre consensuáu cola comunidá educativa.

Debe dotase a tolos centros de personal d’alministración y servicios suplementariu pa llantar un programa con vocación universal y que faga del préstamu y la reutilización del material escolar un aspectu central na programación de la enseñanza.

N’Uviéu, a 11 de mayu del 2015

 

Esta entrada tamién se puede consultar en: Castellanu